اداکارہ منیشا کوئرالہ اور سیف علی خان 47برس کے ہوگئے

منیشا کوئرالہ نے اپنے 20 سالہ کیرئیر میں 70 فلموں میں اداکاری کے جوہر دکھائے

جمعرات 17 اگست 2017 11:50

اداکارہ منیشا کوئرالہ اور سیف علی خان 47برس کے ہوگئے
ممبئی (اُردو پوائنٹ اخبارتازہ ترین - این این آئی۔ 17 اگست2017ء) بالی وڈ اداکارہ منیشا کوئرالہ اور سیف علی خان 47برس کے ہوگئے ۔ اداکارہ منیشا کوئرالہ نیپال میں پیدا ہوئیں ۔ ان کی پہلی بالی وڈ فلم سوداگر تھی ۔ منیشا کوئرالہ نے نیپالی ، تامل اور بنگالی فلموں میں اداکاری کے جوہر دکھائے ۔ انہوں نے اپنے 20 سالہ کیرئیر میں 70 فلموں میں اداکاری کے جوہر دکھائے ۔

نائین ٹین فورٹی ٹو ، اے لو سٹوری ، اکیلے ہم اکیلے تم ، دل سے ، کچے دھاگے اور من منیشا کوئرالہ کی مشہور فلمیں ہیں ۔اداکارہ نے انیل کپور ، جیکی شروف ، شاہ رخ ، سلمان ، اجے دیوگن اور عامر خان سمیت بالی ووڈ کے سٹار ہیروز کے ساتھ جوڑی بنائی ۔ منیشا کوئرالہ کو دادا صاحب پھالکے فلم فئیر سمیت کئی اعزاز ملے ۔

(جاری ہے)

حال ہی میں منیشا فلم ڈیئر مایا میں نظر آئی ہیں ۔

دوسری جانب بالی ووڈ اداکار سیف علی خان بھی سینتالیس برس کے ہو گئے ہیں اور آج اپنی سالگرہ منا رہے ہیں ۔ وہ دو فلم فیئر ایوارڈز حاصل کر چکے ہیں جبکہ دو ہزار دس میں بھارتی سرکار نے انہیں عوامی اعزاز پدم شری سے نوازا ۔اداکار سیف علی خان ریاست پٹودی کے نواب اور بھارتی کرکٹر نواب منصور علی خان اور بالی ووڈ اداکارہ شرمیلا ٹیگور کے صاحبزادے ہیں ۔

سیف نے اداکاری کا آغاز 1992ء میں کیا ، ان کو پہلی کامیابی 1994ء میں فلم میں کھلاڑی تو اناڑی اور یہ دل لگی سے حاصل ہوئی ۔ دو ہزار ایک کی فلم دل چاہتا ہے نے ان کی زندگی بدل دی ، انہیں دو ہزار تین میں فلم کل ہو نا ہو کے لیے فلم فیئر اعزاز برائے بہترین معاون اداکار اور 2004 میں فلم ہم تم کے لیے فلم فیئر برائے بہترین اداکار سے نوازا گیا ۔ سلام نمستے ، ریس ، پرینیتا ، اومکارا ، لو آج کل ، ان کی کامیاب فلموں میں شامل ہیں ۔ 2012ء میں انہوں نے مقبول اداکارہ کرینہ کپور سے شادی کر لی ۔
وقت اشاعت : 17/08/2017 - 11:50:31

Rlated Stars :