فلم ’ٹائی ٹینک‘ کی 20 سال بعد تھری ڈی میں نمائش

لاس اینجلس (اُردو پوائنٹ اخبارتازہ ترین - آن لائن۔ 21 نومبر2017ء) ہولی وڈ کی فلمی تاریخ میں دوسرے نمبر پر سب سے زیادہ پیسے بٹورنے والی معروف فلم ’ٹائی ٹینک‘ کو ریلیز کے 20 سال گزرنے کے بعد ایک بار پھر نمائش کے لیے پیش کیا جائے گا۔خیال رہے کہ ’ٹائی ٹینک‘ کو سب سے پہلے نومبر 1997 میں جاپان جب کہ 19 دسمبر 1997 کو امریکا سمیت دنیا بھر میں ریلیز کیا گیا تھا۔

فلم کی ریلیز کو رواں ماہ 20 سال ہوچکے، فلم کی بیسویں سالگرہ کے موقع پر ڈائریکٹر جیمز کیمرون نے اسے ایک بار پھر ’ٹو ڈی اور تھری ڈی‘ میں پیش کرنے کا اعلان کیا۔ جیمز کیمرون نے فلم کو 20 سال مکمل ہونے پر اعلان کیا کہ ’ٹائی ٹینک‘ کو ’ٹو ڈی اور تھری ڈی‘ میں پیش کیا جائے گا۔فلم کو نئی ٹیکنالوجی میں ’ڈول بائے‘ کے تعاون سے پیش کیا جائے گا، اور ابتدائی طور پر صرف امریکا میں ہی اس کی نمائش کی جائے گی۔

(جاری ہے)

فلم کی ٹیم نے دیگر ممالک میں اس کی ٹو ڈی اور تھری ڈی میں نمائش کا اعلان نہیں کیا، تاہم خیال کیا جا رہا ہے کہ 2018 کی ابتدائی سہ ماہی میں اسے دیگر ممالک میں بھی پیش کیا جائے گا۔رومانٹک ڈزاسٹر فلم ’ٹائی ٹینک‘ نے نہ صرف آسکر ایوارڈ جیتا، بلکہ یہ ہولی وڈ کی اب تک کی زیادہ پیسے کمانے والی دوسری بڑی فلم ہے، جب کہ اسے سب سے زیادہ کمانے والی پہلی فلم کا اعزاز 2010 تک رہا۔’ٹائی ٹینک‘ کی زیادہ کمائی کا اعزاز بھی فلم ساز جیمز کیمرون کی ایک اور فلم ’اوتار‘ نے ان سے چھینا۔۔