بھارتی اداکارہ گھر میں جعلی کرنسی چھاپنے کے الزام میں گرفتار

حیدر آباد دکن(اُردو پوائنٹ اخبارتازہ ترین - آن لائن۔ 06 جولائی2018ء) بھارتی ٹی وی اداکارہ سوریا سسی کمار کو گھر میں جعلی کرنسی نوٹ چھاپنے کے الزام میں گرفتار کرلیاگیا ہے۔بھارتی میڈیا کے مطابق ریاست کیرالہ سے تعلق رکھنے والی ٹی وی اداکارہ سوریا سسی کمار کو پولیس نے ان کی بہن اور والدہ سمیت گرفتار کرلیا ہے،ان پر الزام ہے کہ انہوں نے اپنے گھر میں نوٹ چھاپنے کی مشین رکھی ہوئی تھی جس سے وہ جعلی کرنسی نوٹ چھاپ رہی تھیں۔

پولیس کا کہنا تھا کہ سوریا کے گھر میں نوٹ چھاپنے کیلئے تمام ضروری سامان موجود تھا پولیس نے سوریا سمیت 8 مزید افراد کو گرفتار کیا ہے جو اس جرم میں شریک تھے،گرفتار ہونیو الے تمام افراد کو جوڈیشل ریمانڈ پر بھیج دیاگیا ہے۔پولیس حکام کا کہنا تھا کہ اداکارہ کے گھر سے جعلی کرنسی نوٹ، نوٹ چھاپنے کے کاغذ اور پرنٹر سمیت نوٹ چھاپنے میں استعمال ہونے والا دیگر سامان برآمد ہوا ہے، جبکہ انہوں نے اپنے گھر میں 5 لاکھ کی رقم بھی جمع کر رکھی تھی اور یہ تمام نوٹ جعلی تھے۔

(جاری ہے)

اداکارہ سوریا اور ان کے گھر والوں نے اپنے جرم کا اعتراف کرتے ہوئے کہا کہ وہ جعلی نوٹ چھاپنے کا کاروبار گزشتہ برس ستمبر سے کررہے ہیں۔واضح رہے کہ اداکارہ سوریا کیرالہ ٹی وی چینلز کے متعدد ڈراموں میں اداکاری کے جوہر دکھا چکی ہیں۔