اداکار عامر خان کا اشتہار کے ذریعے سماجی پیغام

ممبئی(اُردو پوائنٹ اخبارتازہ ترین - آن لائن۔ 06 اپریل2017ء) بولی وڈ اداکار عامر خان ہمیشہ ہی اپنی فلموں کے ذریعے ایک سماجی پیغام ضرور دیتے ہیں اور یہی وجہ ہے کہ انٹرٹینمنٹ انڈسٹری میں عامر خان کو ان کی شاندار پرفارمنس اور بہترین فلموں کے باعث مسٹر پرفیکٹشنسٹ کا نام دیا جاتا ہے۔اور اب عامر خان نے اپنے ایک اشتہار میں بھی شائقین کو ایک خوبصورت پیغام دیا۔

عامر خان نے ہندوستان چینل اسٹار پلس کے لیے ایک اشتہار بنایا جس میں معاشرے میں بیٹوں اور بیٹیوں کو برابر سمجھنے کا پیغام دیا گیا ہے۔

(جاری ہے)

اس اشتہار میں عامر خان نے گردیپ سنگھ نامی سکھ آدمی کا روپ اپنایا جن کی مٹھائی کی دکان کی نئے سرے سے مرمت جاری ہے، کاروبار بہتر چلنے پر جب ایک گاہک نے ان کی تعریف کی تو عامر خان نے کہا 'یہ سب بچوں کا کمال ہے، انہوں نے انٹرنیٹ پر میرا بزنس آگے بڑھایا'۔

اس پر گاہک نے کہا 'بڑے قابل ہوگئے ہیں آپ کے بیٹی'، جس پر عامر خان کا کہنا تھا کہ 'بیٹے نہیں بیٹیاں'۔عامر خان کے اس اشتہار کو اسٹار پلس نے 'کامیابی صرف سوچ دیکھتی ہی' کا نام دیا۔اشتہار میں دکھایا گیا کہ عامر خان کی دکان کا نام 'گردیپ سنگھ اینڈ ڈوٹرز' (گردیپ سنگھ اور ان کی بیٹیاں) رکھا گیا۔