عدنان سمیع خان اپنی ڈیبیو فلم’ ’افغان‘‘ کی شوٹنگ میں مصروف ہیں

ممبئی (اُردو پوائنٹ اخبارتازہ ترین - این این آئی۔ 06 دسمبر2017ء) وزن کم کرنے کے بعد گلوکارعدنان سمیع بہت جلد ایک فلم میں ڈیبیو بھی کرتے نظر آئیں گے‘ عدنان سمیع خان ان دنوں اپنی ڈیبیو فلم ’افغان‘ کی شوٹنگ میں مصروف ہیں۔اپنے ایک انٹرویو میں عدنان سمیع خان نے اپنی بیٹی مدینہ کی پیدائش کے بعد سے زندگی میں ہونے والی تبدیلیوں پر بات کی۔گلوکار نے کہا کہ ’شکر گزار ہونا کافی چھوٹا لفظ ہے، کیوں کہ خدا نے مجھے میری زندگی دوبارہ شروع کرنے کے لیے نئے مواقع دیئے۔

عدنان سمیع کی زندگی سب سے پہلے تب تبدیل ہونا شروع ہوئی، جب انہوں نے وزن کم کرنا شروع کیا۔اس حوالے سے گلوکار نے بتایا کہ ’موٹاپے کے دوران ایک وقت ایسا آگیا تھا جب مجھے لگا کہ میں مرجاؤں گا، پھر میں نے اپنی زندگی دوبارہ شروع کرنے کے لیے وزن کم کیا، جب میرے بابا کا انتقال ہوا، میں کافی ٹوٹ گیا تھا، لیکن مجھے سکون سے شادی شدہ زندگی گزارنے کے لیے ساتھی مل گیا۔

(جاری ہے)

کامیابی سے وزن کم کرنے کے بعد عدنان سمیع بہت جلد ایک فلم میں ڈیبیو بھی کرتے نظر آئیں گے، جبکہ ان کی بیٹی کی ہیدائش کے بعد وہ اپنی زندگی خوشی سے گزار رہے ہی۔خیال رہے کہ عدنان سمیع خان کے ہاں رواں سال بیٹی ’مدینہ‘ کی پیدائش ہوئی تھی۔اپنی بیٹی کے حوالے سے گلوکار نے بتایا کہ ’وہ میرے دل کی دھڑکن ہے، میں خدا کا بے حد شکر گزار ہوں، مجھے لگتا ہے میری بیٹی نے میری اور اہلیہ رویا کی بہترین خصوصیات لی ہیں۔

عدنان سمیع نے مزید کہا کہ وہ اپنی بیٹی آزاد معاشرے میں پرورش چاہتے ہیں۔انہوں نے بتایا کہ میں چاہتا ہوں میری بیٹی جب بڑی ہو تو اسے آزادی کا احساس ہو، اور ایسا تعلیم سے ہوگا، میں چاہتا ہوں وہ ہر معاملے پر اپنی رائے رکھتی ہو، اور غلط کیخلاف آواز اٹھائے۔خیال رہے کہ عدنان سمیع خان ان دنوں اپنی ڈیبیو فلم ’افغان‘ کی شوٹنگ میں مصروف ہیں۔