ہدایت کارروہت شیٹھی نے شاہ رخ خان کے ساتھ جھگڑے کی افواہوں کی تردید کردی

ممبئی (اُردو پوائنٹ اخبارتازہ ترین - این این آئی۔ 12 جنوری2019ء) بالی ووڈ ہدایت کارروہت شیٹھی نے شاہ رخ خان کے ساتھ جھگڑے کی افواہوں کی تردید کردی ہے۔روہت شیٹھی کا شماربالی ووڈ کے نامور ہدایت کاروں میں ہوتا ہے جنہوں نے فلم انڈسٹری کو ’گول مال‘، ’گول مال اگین‘، ’سنگھم‘، ’سمبا‘ سمیت متعدد سپر ہٹ فلمیں دی ہیں۔ 2013 میں روہت شیٹھی اورشاہ رخ خان نے فلم ’چنائے ایکسپریس‘ میں ایک ساتھ کام کیا تھا اور یہ فلم سپر ہٹ ثابت ہوئی تھی۔

دوسال بعد ان دونوں نے ایک اور بڑی فلم ’دل والے‘ بنائی تاہم یہ فلم شائقین کو متاثرکرنے میں ناکام رہی۔ فلم ’دل والے‘ کے بعد سے ہی بالی ووڈ میں روہت شیٹھی اورشاہ رخ خان کے درمیان تعلقات خراب ہونے کی خبریں گردش کررہی ہیں۔اس حوالے سے جب روہت شیٹھی نے ایک انٹرویو میں کہا ہے کہ میرے اور شاہ رخ کے درمیان جھگڑے کی خبروں میں کوئی حقیقت نہیں، فلم ’سمبا‘ کا ٹائٹل اور ڈیجیٹل کام ریڈ چلیز انٹرٹینمنٹ نے کیا ہے اور یہ شاہ رخ خان کی کمپنی ہے، جب کہ اسی وقت کمپنی میں ’زیرو‘ کا کام بھی چل رہا تھا، اگر میرے اور ان کے درمیان جھگڑا ہوتا تو میں ان کی کمپنی سے اپنی فلم کا کام کیوں کرواتا۔

(جاری ہے)

روہت نے شاہ رخ کے ساتھ فلم نہ کرنے کے بارے میں کہا اگر میں نے شاہ رخ کے ساتھ فلم نہیں کی تو اس کا یہ مطلب نہیں کہ ہمارے درمیان لڑائی ہے۔