مہوش حیات سندھ میں خستہ حال اسکولوں کی بحالی کیلئے پرعزم

لندن(اُردو پوائنٹ اخبارتازہ ترین - این این آئی۔ 20 اگست2019ء) اداکارہ مہوش حیات سندھ میں خستہ حال اسکولوں کی بحالی کے لیے پٴْرعزم ہیں اور انہوں نے سکھر کے 5 اسکولوں اور ان میں پڑھنے والے سیکڑوں بچوں کی تعلیم کا بیڑہ اٹھایا ہے۔اداکارہ مہوش حیات نے حال ہی میں برطانوی نشریاتی ادارے کو انٹرویو دیتے ہوئے کہا ہے کہ موجودہ دور میں صرف اداکار یا اداکارہ ہونا کافی نہیں بلکہ شائقین سے ملنے والی عزت اورطاقت کو استعمال کرتے ہوئے ہمیں اپنے ملک، معاشرے اور دنیا کے مسائل کے حل میں بہتری لانی چاہئے۔

مہوش حیات کے مطابق فنکار کو قومیت سے ہٹ کر پٴْرامن مستقبل کے لیے کام کرنا چاہئے۔مہوش حیات پاکستان کی پہلی خاتون وزیراعظم بے نظیر بھٹو کی زندگی پر بننے والی فلم میں مرکزی کردار ادا کررہی ہیں اس حوالے سے بات کرتے ہوئے مہوش نے بتایاکہ یہ بہت پیچیدہ اور مشکل کردار ہے تاہم اس فلم کی کہانی بہت متاثر کن ہے اور ہماری موجودہ اور آئندہ آنے والی نسل کے لیے ضروری ہے کہ وہ بے نظیر بھٹو کی خدمات اور ان کی جدوجہد کو دیکھیں۔

(جاری ہے)

مہوش حیات نہ صرف لوگوں کو تفریح فراہم کرنے کا کام کررہی ہیں بلکہ وہ ایک بین الاقوامی فلاحی تنظیم گلوبل چیریٹی پینی اپیل کے ساتھ مل کر پاکستان کے صوبہ سندھ کے غریب بچوں کی تعلیم کے لیے بھی کوششیں کررہی ہیں۔اس مقصد کے لیے مہوش حیات اگلے سال لندن میں منعقد ہونے والی میراتھان میں حصہ لیں گی اور صوبہ سندھ کے شہر سکھر میں 5 اسکولوں کی تعمیر کے لیے تقریباً ایک لاکھ یورو فنڈ اکھٹا کریں گی۔ مہوش حیات نے لوگوں سے اپیل کہ ہے کہ وہ اس نیک کام میں ان کا ساتھ دیں۔