اداکارہ سارہ خان کے پہلے ڈیبیو کی تصاویر وائرل

کراچی (اُردو پوائنٹ اخبارتازہ ترین - این این آئی۔ 13 اگست2020ء) پاکستانی اداکارہ سارہ خان حالیہ چند برسوں میں مداحوں کی توجہ حاصل کرنے میں کامیاب رہی ہیں اور ان کے ڈرامے بھی کافی مقبول ہوئے ہیں۔گزشتہ دنوں سوشل میڈیا پر گلوکار فلک و شبیر سے ان کی شادی کے چرچا بھی رہا۔سارہ خان اور فلک شبیر نے 14 جولائی کو منگنی کا اعلان کیا تھا اور اگلے ہی دن دونوں کی شادی کی تقریبات کا آغاز ہوا تھا اور وہ 17 جولائی کو شادی کے بندھن میں بندھ گئے تھے۔

اور نجی ٹی وی چینل پر نشر ہونے والے ڈرامے ’’ ثبات‘‘ میں ان کے منفی کردار کے طور پر ان کی اداکاری کو بھی خوب سراہا جارہا ہے۔سارہ خان نے اب تک مختلف پاکستانی ڈراموں میں کام کیا ہے جو مقبول بھی ہوئے اور اب سوشل میڈیا پر ان کے پہلے ڈیبیو کی تصاویر وائرل ہوگئی ہیں جس میں وہ پہلی مرتبہ اسکرین پر نظر آئی تھیں۔

(جاری ہے)

اداکارہ کی یہ تصاویر دراصل 2012 میں ریلیز ہونے والے گانے 'آنکھوں میں' کی وٰیڈیو سے ہیں، جس سے انہوں نے شوبز انڈسٹری میں قدم رکھا تھا۔

یہ گانا گلوکار سہیل حیدر نے گایا تھا اور اب سارہ خان کی تصاویر وائرل ہونے کے بعد اسے دوبارہ دیکھا جارہا ہے۔اپنی پہلی ویڈیو میں سارہ خان موجودہ طرز لباس کے مقابلے میں بالکل مختلف انداز میں دکھائی دی ہیں جس پر مداحوں نے حیرت کا اظہار کیا ہے تو کچھ نے تنقید بھی کی ہے۔کچھ صارفین نے ان کے لباس کو تنقید کا نشانہ بنایا تو کچھ نے کہا کہ سارہ خان نے 8 برس میں خود کو بہت گروم کیا ہے۔

خیال رہے کہ ویڈیو میں ان کے لباس کو اس لیے بھی تنقید کا نشانہ بنایا جارہا ہے کہ انہوں نے خود اس حوالے سے ایک بیان بھی دیا تھا۔کچھ عرصہ قبل ایک پروگرام میں فلمی دنیا کا رخ نہ کرنے سے متعلق سارہ خان نے کہا تھا کہ انہیں کچھ پیشکشیں ہوئی مگر وہ مختصر ملبوسات کو پہننا اور قربت کے مناظر کو فلمانا نہیں چاہتیں، جو فلموں کی اولین مانگ ہوتے ہیں۔

2012 میں اس میوزک ویڈیو کے بعد وہ اسی برس ہم ٹی وی کے ڈرامے بڑی آپا میں سپورٹنگ رول میں دکھائی دی تھی۔اس کے علاوہ انہوں نے محبت آگ سی، نظرِبد، بیلا پور کی ڈائن اور بند کھڑکیاں میں بھی اداکاری کی تھی اور بیلاپور کی ڈائن پر انہیں بہترین اداکارہ کا اعزاز بھی حاصل کیا تھا۔سارہ خان ان دنوں ثبات ڈرامے میں منفی کردار ادا کررہی ہیں جسے مداحوں کی جانب سے خوب سراہا جارہا ہے۔