پولیس نے جعلی نمبر پلیٹ استعمال کرکے اداکارہ کے چالان پر چالان کٹوانے والے شخص کو گرفتار کرلیا

ممبئی (اُردو پوائنٹ اخبارتازہ ترین - آن لائن۔ 01 مارچ2021ء) اداکارہ سنی لیون ٹریفک کے چالان پر چالان ہونے سے پریشان تھیں جس پر انہوں نے پولیس سے رابطہ کیا تو پتہ چلا کہ ان کی گاڑی کی نمبر پلیٹ سے ملتا جلتا نمبر کوئی اور شخص اپنی گاڑی پر استعمال کر رہا ہے۔تفصیلا ت کے مطا بق ٹریفک چالانوں سے تنگ سنی لیون کے ڈرائیور اکبر خان نے گزشتہ روز پولیس کو اطلاع دی کہ اداکارہ کی گاڑی سے ملتی جلتی ایک گاڑی ہسپتال کے باہر کھڑی ہے۔

(جاری ہے)

ٹریفک پولیس فوراً موقع پر پہنچی اور گاڑی اور اس میں موجود شخص کو تھانے لے آئی، تھانے میں سنی لیون کے شوہر ڈینیل ویبر کو بھی طلب کیا گیا۔پولیس نے فریقین سے گاڑی کے کاغذات مانگے تو تصدیق ہوگئی کہ مرسیڈیز گاڑی ڈینیل ویبر کے نام پر رجسٹرڈ ہے۔ پولیس نے جعلی نمبر پلیٹ استعمال کرکے اداکارہ کے چالان پر چالان کٹوانے والے شخص کو گرفتار کرلیا۔ ملزم ممبئی کے علاقے کلیان کا ایک مشہور تاجر ہے جس کے خلاف مزید قانونی چارہ جوئی کی جا رہی ہے۔