ٹائیگر شیروف ، کیرتی سینن کی فلم کامیاب

ممبئی(اُردو پوائنٹ اخبار تازہ ترین۔2جون۔2014ء) معروف بالی وڈ ہیرو جیکی شیروف کے بیٹے ٹائیگر شیروف اور نئی ایکٹریس کیرتی سینن کی پہلی فلم ’ہیروپنتی‘ سے فلمی پنڈتوں نے بہت زیادہ توقعات نہیں جوڑی تھیں لیکن فلم نے اپنی ریلیز کے ساتھ ہی اچھا بزنس کرکے سب کو حیران کردیا۔بالی وڈکی روایات کے مطابق، فلم کے ساتھ ساتھ ان دونوں نئے فنکاروں کی قسمت کے ستارے بھی چمکنے لگے ہیں۔

خیال کیا جارہا ہے کہ ’ہیرو پنتی‘ دونوں فنکاروں کے لئے اپنے دامن میں مزید کئی آفرز لارہی ہے۔دبئی کے ایک اخبار’دی نیشنل‘ کا کہنا ہے کہ ٹائیگر جہاں اپنی پہلی فلم ہٹ ہونے پر خوش ہیں وہیں انہوں نے یہ بھی تسلیم کیا ہے کہ جیکی شیروف جیسے بڑے اسٹار کا بیٹا ہونے کی وجہ سے ان پر بہترین کارکردگی کے لئے دباﺅ تھا۔

(جاری ہے)

ان کا یہ بھی کہنا ہے کہ پچھلے دوسال سے ’ہیروپنتی‘ ہی ان کے لئے سب کچھ تھی۔

یہ فلم ان کیلئے ایک اہم سنگ میل کی حیثیت رکھتی ہے۔ فلم میں تمام اسٹنٹ ٹائیگر نے خود پکچرائز کرائے ہیں۔دوسری جانب ہیروئن کیرتی سینن کے لئے بالی وڈ میں اینٹری خواب سچ ہونے کے مساوی ہے جس پر پہلے پہل تو خود انہیں بھی یقین نہیں آیا تھا۔کیرتی کا کہنا ہے کہ بالی وڈ کا حصہ بننا بڑی بات ہے۔ وہ اپنی صلاحیتوں کا بھرپوراستعمال کرکے بالی وڈ میں اپنی منفرد پہچان بنائیں گی۔’ہیروپنتی‘ کے ڈائریکٹر صابر خان کے مطابق انہوں نے فلم کے لئے کیرتی کا انتخاب اس وقت سے کر رکھا تھا جب سے کیرتی کو ایک ٹوتھ پیسٹ کے اشتہار میں دیکھا تھا۔