شاہ رخ و سری دیوی کی بیٹیاں، سیف علی و شویتا بچن کے بیٹے شوبز میں آنے کو تیار

ممبئی (اُردو پوائنٹ اخبارتازہ ترین - این این آئی۔ 21 اگست2021ء) فلم ساز زویا اختر اپنی آنے والی ویب سیریز میں بولی وڈ اداکار شاہ رخ خان اور آنجھانی اداکارہ سری دیوی کی بیٹیوں سمیت سیف علی خان اور شویتا بچن کے بیٹوں کو متعارف کرانے جا رہی ہیں۔بھارتی میڈیا کے مطابق شاعر و نغمہ نگار جاوید اختر کی بیٹی فلم ساز زویا اختر کامک بک آرچی پر بنی امریکی ٹی وی سیریز کا ہندی ورژن بنائیں گی، جس میں انہوں نے سٹارز کے بچوں کو متعارف کرانے کا فیصلہ کرلیا۔

رپورٹ کے مطابق زویا اختر نیٹ فلیکس کیلئے امریکی ٹی وی سیریز رور ڈیل کا ہندی ورژن تیار کریں گی جو کہ نو عمر کرداروں پر بنی سیریز ہے۔مذکورہ سیریز کے تین اہم کرداروں میں دو لڑکیوں جب کہ ایک لڑکے کا کردار ہے اور خبرہیں کہ زویا اختر نے مرکزی کرداروں کیلئے شاہ رخ خان کی بیٹی سہانا خان، آنجھانی اداکارہ سری دیوی کی بیٹی خوشی کپور اور سیف علی خان کے بیٹے ابراہیم علی خان کو شارٹ لسٹ کرلیا ہے۔

(جاری ہے)

پہلے خبریں تھیں کہ زویا اختر نے سہانا خان، خوشی کپور اور ابراہیم علی خان کو کاسٹ کرنے کا منصوبہ تیار کرلیاہے، تاہم اب یہ خبریں بھی ہیں کہ انہوں نے امیتابھ بچن کے نواسی اگستیا نندا کو بھی شارٹ لسٹ کرلیا۔ رپورٹ کے مطابق یہ طے ہے کہ دونوں لڑکیوں کے مرکزی کردار سہانا خان اور خوشی کپور ادا کریں گی، تاہم لڑکے کے مرکزی کردار پر فلم ساز اور ویب سیریز کی ٹیم تذبذب کا شکار ہے۔

افواہیں ہیں کہ ویب سیریز میں لڑکے کے مرکزی کردار کیلئے ابراہیم علی خان اور اگستیا نندا میں سے کسی ایک کو کاسٹ کیا جائے گا، تاہم امکان ہے کہ سیف علی خان کے بیٹے کو سیریز کا حصہ بنایا جائے گا۔میڈیا رپورٹ کے مطابق امریکی ٹی وی سیریز کے ہندی ورژن میں بیٹی نامی کردار کے روپ میں سہانا خان جبکہ ورونیکا کے کردار میں خوشی کپور کو دکھایا جائے گا۔رپورٹ میں بتایا گیا کہ ویب سیریز میں آرچی کے لڑکے کے مرکزی کردار کیلئے سیف علی خان کے بیٹے ابراہیم علی خان کو کاسٹ کیا جائے گا۔