ترکی میں پاکستانیوں کی جانب سے خاتون کو ہراساں کرنے پر انوشے اشرف برہم

منگل 17 مئی 2022 23:52

لاہور (اُردو پوائنٹ اخبارتازہ ترین - آن لائن۔ 17 مئی2022ء) ماڈل، ویڈیو جوکی (وی جی) اور اداکارہ انوشے اشرف نے پاکستانی مرد حضرات کی جانب سے ترکی میں مبینہ طور پر خواتین کو ہراساں کرنے پر برہمی کا اظہار کرتے ہوئے کہا کہ ایسے لوگوں کو بیرون ممالک کا ویزا نہیں بلکہ کیریکٹر سرٹیفکیٹ دیا جانا چاہیے۔انوشے اشرف نے انسٹاگرام پر ترکی میں پاکستانی مرد حضرات کی جانب سے خواتین کو ہراساں کرنے اور بلا اجازت ان کی تصاویر اور ویڈیوز بنانے سے متعلق خبر کا اسکرین شاٹ شیئر کرتے ہوئے اظہار برہمی کیا۔

انوشے اشرف نے لکھا کہ حلیمہ سلطان کے لباس پر تشویش کا اظہار کرنے والے پاکستانیوں کی سوچ کو مد نظر رکھتے ہوئے انہیں دنیا میں کسی بھی ملک کا ویزا دیے جانے کے بجائے انہیں خواتین کو بطور انسان سمجھنے کا سرٹیفکیٹ یا ڈپلومہ دیا جانا چاہیے۔

(جاری ہے)

ماڈل و اداکارہ نے لکھا کہ ایسے پاکستانی مرد حضرات کو یہ سرٹیفکیٹ تھمایا جائے کہ وہ خواتین کو ان کے لباس کی وجہ سے نہیں بلکہ انہیں ایک انسان کی حیثیت سے دیکھتے ہیں۔

انوشے اشرف نے لکھا کہ ایسے پاکستانی مرد حضرات سے دنیا کے تمام مرد تو نہیں البتہ بہت ساری خواتین ہمیشہ خود کو غیر محفوظ تصور کرتی ہیں۔انہوں نے جس خبر کا اسکرین شاٹ شیئر کیا، اس میں بتایا گیا تھا کہ ترکی کے سوشل میڈیا پر ’پاکستانی گیٹ آئوٹ‘ اور ’پاکستانیوں کا رویہ ناقابل قبول ہے‘ جیسے ٹرینڈ چلنے لگے۔مذکورہ خبر کے مطابق ترکی کے سوشل میڈیا پر اس وقت مذکورہ ٹرینڈ ٹاپ پر آگئے جب کہ رواں ماہ مئی کے آغاز میں ترکی کے شہر استنبول میں پاکستانیوں کی جانب سے مبینہ طور پر خواتین کو ہراساں کرنے اور بلااجازت ان کی تصاویر اور ویڈیوز بنانے کا معاملہ سامنے آیا تھا۔
وقت اشاعت : 17/05/2022 - 23:52:47

مزید متعلقہ خبریں پڑھئیے‎ :

متعلقہ عنوان :