عاطف اسلم کی سپر ہٹ گانے کیساتھ بھارت میں واپسی

کراچی (اُردو پوائنٹ اخبارتازہ ترین - این این آئی۔ 25 جون2022ء) عالمی شہرت یافتہ پاکستانی گلوکار عاطف اسلم کی اپنے نئے سپر ہٹ گانے رنگریزہ کے ساتھ بھارتی میوزک انڈسٹری میں واپسی ہوگئی ہے۔پاک بھارت کشیدگی کے باعث بھارت کی حکومت نے پاکستانی فنکاروں پر پابندی عائد کی ہوئی ہے لیکن عاطف اسلم، راحت فتح علی خان سمیت پاکستانی گلوکاروں کے چرچے آج بھی بھارت میں ہوتے نظر آرہے ہیں۔

(جاری ہے)

اب عاطف اسلم نے بھارتی پنجابی فلم کیلئے اپنا نیا گانا ریکارڈ کروایا ہے جس کا عنوان رنگریزہ ہے جبکہ گانا پنجابی زبان میں گایا گیا ہے۔یہ گانا گزشتہ روز ریلیز کیا گیا جس کے بعد بھارت میں موجود عاطف اسلم کے مداح خوشی سے نہال ہوگئے کیونکہ مداح بھارتی حکومت کی پابندی کے بعد سے کافی مایوس تھے۔جیسے ہی گانا رنگریزہ ریلیز ہوا تو ہیش ٹیگ عاطف اسلم ٹوئٹر پر ٹرینڈ کرنے لگا اور اس وقت بھی ٹوئٹر پر ہیش ٹیگ RangReza By Atif Aslam ٹرینڈ کررہا ہے۔اس ٹریک کے بول ببو نے لکھے ہیں جبکہ موسیقی سنیپر نے دی ہے۔سوشل میڈیا پر پاک بھارت مداحوں کی جانب سے عاطف اسلم کے گانے کی خوب تعریف کی جارہی ہے۔