جیک اسپیرو کے بھیس میں بھیک مانگنے والے کی ویڈیو وائرل

لاس اینجلس (اُردو پوائنٹ اخبارتازہ ترین - این این آئی۔ 05 جولائی2022ء) مشہورِ زمانہ امریکی فلم سیریز پائریٹس آف کیریبیئن کے کردار جیک اسپیرو (جانی ڈیپ)کے بھیس میں ایک شخص بھیک مانگنے لگا۔یہ دلچسپ ویڈیو سوشل میڈیا پر وائرل ہو رہی ہے جبکہ بھیک مانگنے والے کو لوگ جانی ڈیٹ کہہ کر مخاطب کر رہے ہیں۔ یہ ویڈیو اس وقت پہلی مرتبہ منظر عام پر آئی تھی جب جانی اپنی سابق اہلیہ ایمبر ہرڈ کیخلاف قانونی جنگ لڑنے کیلئے عدالتی کارروائیوں میں مصروف تھے، تاہم ایک مرتبہ پھر یہ سوشل میڈیا پر وائرل ہو رہی ہے۔

ویڈیو میں دیکھا جاسکتا ہے کہ ایک شخص ہوبہو جیک اسپیرو بن کر سڑکوں پر بھیک مانگنے نکل پڑا ہے۔ کار سوار نے اس گداگر کی ویڈیو بنائی جس میں یہ شخص جیک اسپیرو کی طرح چلتا ہوا کار کے قریب آتا ہے اور اپنی کھلونا بندوق دکھا کر راہ زنی کی واردات کی طرح پیسے مانگتا ہے جس کیلئے وہ اپنا ہیٹ پیش کرتا ہے اور پیسے لے کر جیک اسپیرو کی طرح مسکراتا ہوا چلا جاتا ہے۔

(جاری ہے)

اس پوسٹ کو دیکھ کر سوشل میڈیا صارفین بھی اپنے تبصروں سے پیچھے نہ رہے اور اس کی اس اداکاری کو بہترین پرفارمنس قرار دے دیا۔ ایک نے تو یہاں تک کہہ دیا کہ میں بھکاری کی اس کوشش پر اسے 100ڈالر دے دیتا۔ یہ ویڈیو کس ملک کی ہے یہ تو واضح نہیں ہوسکا، لیکن سوشل میڈیا پر اسے خوب پسند کیا جارہا ہے۔