پریانکا چوپڑا نے بھارتی انڈسٹری چھوڑ کر ہالی ووڈ جانے کی وجہ بتا دی

نیویارک (اُردو پوائنٹ اخبارتازہ ترین - این این آئی۔ 28 مارچ2023ء) بھارتی نژاد امریکی اداکارہ پریانکا چوپڑا نے کہا ہے کہ بالی ووڈ سے اس لئے کنارہ کشی اختیار کی کیونکہ مجھے وہ کام نہیں مل رہا تھا جو وہ چاہتی تھیں اور کچھ لوگوں کے ساتھ ان کے تعلقات خراب تھے۔بھارتی میڈیا رپورٹ کے مطابق اداکارہ پریانکا چوپڑا نے ایک حالیہ امریکی پوڈ کاسٹ میں گفتگو کرتے ہوئے بتایا کہ میوزک کمپنی دیسی ہٹس کی انجولا اچاریہ نے انہیں ایک میوزک ویڈیو میں دیکھا اور اس وقت فون کیا جب وہ سات خون معاف کی شوٹنگ کر رہی تھیں۔

انجولا اچاریہ نے اداکارہ سے پوچھا کہ کیا وہ امریکہ میں میوزک کیریئر کا آغاز کرنے میں دلچسپی رکھتی ہیں جس پر پریانکا نے فوری ہاں کر دی۔پریانکا نے کہا کہ اس وقت وہ بھی بالی ووڈ سے باہر نکلنے کا راستہ تلاش کر رہی تھیں۔

(جاری ہے)

انہوں نے بتایا کہ بالی ووڈ میں انہیں ایک کونے میں دھکیلا جا رہا تھا اور کوئی انہیں کاسٹ نہیں کر رہا تھا، نہ ہی انہیں ویسا کرداد مل رہا تھا جیسا وہ چاہتی تھیں اس لئے انہیں بالی ووڈ سے ایک وقفے کی ضرورت تھی۔پریانکا نے کہا کہ موسیقی نے انہیں ہالی ووڈ میں جانے کا موقع فراہم کیا اور پھر انہوں نے امریکی فلموں میں کام تلاش کرنے کی کوشش جاری رکھی جس میں وہ کامیاب رہیں اور اب وہ ہالی ووڈ میں کئی فلموں کا حصہ بن چکی ہیں۔