ٹائم میگزین کا سرورق، 'اے آئی کی 100 بااثر شخصیات' میں انیل کپور بھی شامل

نیویارک(اُردو پوائنٹ اخبارتازہ ترین - آن لائن۔ 07 ستمبر2024ء) معروف امریکی میگزین ٹائم نے آرٹیفیشل انٹیلی جنس (اے آئی)کے غلط استعمال کو روکنے کے لیے کوششیں کرنے والے افراد کی فہرست جاری کردی ہے جس میں بالی ووڈ اسٹار انیل کپور کا نام بھی شامل ہے۔ٹائم میگزین نے گزشتہ سال کی طرح، اس سال بھی اینٹی اے آئی کی 100 بااثر شخصیات کی فہرست جاری کردی ہے جس میں دنیا بھر سے ان افراد کو شامل کیا گیا ہے جنہوں نے مصنوعی ذہانت کے غلط استعمال کی روک تھام کے لیے کوشش کی ہے۔

امریکی میگزین کی جانب سے جاری کی گئی فہرست میں میٹا کے مالک مارک زکربرگ اور گوگل کے چیف ایگزیکٹو افسر (سی ای او)سندر پچائی سمیت سعودی عرب، متحدہ عرب امارات (یو اے ای)کے مختلف سرکاری اداروں کے سربراہ بھی شامل ہیں۔

(جاری ہے)

فہرست میں جہاں اوپن چیٹ اے آئی کے بانی سمیت اسی کمپنی کے اعلی عہدیداران کو شامل کیا گیا ہے تو وہیں ٹائم میگزین کی اس فہرست میں دنیا بھر کے ٹیکنالوجی اداروں کے ملازمین اور سربراہان بھی شامل ہیں۔

ٹائم 100 اے آئی کی فہرست میں بالی ووڈ کے سپر اسٹار انیل کپور کو بھی شامل کیا گیا ہے جبکہ اسی فہرست میں ہالی ووڈ اداکارہ اسکارلیٹ جانسن بھی شامل ہیں۔ٹائم میگزین نے انیل کپور اور اسکارلیٹ جانسن کو اے آئی کے غلط استعمال کے لیے قانونی جنگ لڑنے کی وجہ سے فہرست میں شامل کیا ہے۔میڈیا رپورٹس کے مطابق انیل کپور نے اے آئی کے غلط استعمال کی روک تھام کے لیے عدالت سے رجوع کرتے ہوئے تحفظ مانگا تھا۔انیل کپور کا کہنا تھا کہ ان کی اجازت کے بغیر ان کا نام، تصاویر، ویڈیوز اور آواز کسی بھی اے آئی پلیٹ فارم پر استعمال نہ کی جائے، اس کیس میں عدالت نے اداکار کے حق میں بھی فیصلہ دیا تھا۔