اپنی بہترین پرفارمنس سے رینا رائے کو ٹریبوٹ پیش کرنا چاہتی ہوں، مروہ حسین

لاہور(اُردو پوائنٹ اخبار تازہ ترین۔ 12 اکتوبر۔2015ء) پاکستانی ماڈل واداکارہ مروہ حسین کی پہلی بالی ووڈ فلم ”صنم تیری قسم “ 2016 میں نمائش کے لیے پیش کی جائے گی۔ جس کی شوٹنگ کیپ ٹاوٴن جنوبی افریقہ میں کی گئی ہے۔یہ فلم کمل ہاسن اور رینا رائے کی 1982 میں ریلیز ہونے والی فلم ”صنم تیری قسم“ کا ری میک ہے۔ جس کی دیگر کاسٹ میں قادر خان، جگدیپ، رنجیت، جیون شامل تھے۔

مذکورہ فلم سپرہٹ رہی جب کہ آر ڈی برمن نے اس کا میوزک ترتیب دیا تھا جب کہ کشور کمار اور آشا بھوسلے کے گانے آج بھی زبان زدوعام ہیں۔ ذرائع کے مطابق کیپ ٹاوٴن میں 50فیصد سے زائد فلم کی شوٹنگ کرلی گئی ہے۔ فلم میں ان کے مقابل تیلگو اداکار ہرش وردھن رانے ہیں۔”صنم تیری قسم “ کا پہلا پوسٹر بھی لانچ ہوچکا ہے جس میں اداکارہ عروسی لباس پہنے باتھ ٹب میں پھولوں کی پتیوں میں لیٹی ہیرو کا ہاتھ تھامے نظر آرہی ہیں۔

(جاری ہے)

مروہ حسین کا اس بارے میں کہنا ہے کہ یہ ایک لواسٹوری میوزیکل فلم ہے۔پوسٹر دیکھ کر جس طرح کی قیاس آرائیاں کی جارہی ہیں اس میں ایسا کچھ نہیں ہے یہ سب سین اور کہانی کے مطابق ہے۔ کمل ہاسن اور رینا رائے کی فلم کا ریمیک کے سوال پر انھوں نے کہا کہ اپنے دور کی یہ ایک سپرہٹ فلم تھی ۔ ایسی فلموں کو فلم بین آج بھی دیکھنا چاہتے ہیں۔ بالی ووڈ اور ہالی ووڈ میں ابھی تک جتنی بھی سپرہٹ فلموں کے ریمیک بنائے گئے انھیں پسند کیاگیا۔ بالی ووڈ کی اس سپرہٹ فلم کے ریمیک کا حصہ بن کر خوشی ہے اورمیری کوشش ہوگی کہ اپنی بہترین پرفارمنس کے ذریعے رینا رائے کو ٹریبوٹ دوں۔