مومل شیخ کی بولی وڈ ڈیبیو فلم کا ٹریلر جاری

لاہور (اُردو پوائنٹ اخبارتازہ ترین - این این آئی۔22 جولائی ۔2016ء) پاکستانی اداکارہ مومل شیخ اور ان کے والد جاوید شیخ کی پہلی بولی وڈ فلم ’ہیپی بھاگ جائے گی‘ کا مزاح سے بھرپور ٹریلر جاری کردیا گیا۔فلم ’ہیپی بھاگ جائے گی‘ میں مومل شیخ کے ساتھ بولی وڈ اداکارہ ڈیانا پینٹی، ابھے دیول اور جمی شیرگل اہم کردار کرتے نظر آئیں گے۔اس فلم کے پہلے ٹریلر کو دیکھ کر یہ کہنا غلط نہ ہوگا کہ ڈیانا پینٹی نے تمام توجہ اپنی طرف مرکوز کرلی۔

واضح رہے کہ ڈیانا کی بولی وڈ میں یہ دوسری فلم ہے، ان کی پہلی فلم ’کوکٹیل‘ 2012 میں ریلیز ہوئی تھی جس کے بعد انہوں نے بولی وڈ فلموں سے وقفہ لے لیا تھا۔اس فلم میں ڈیانا نے ’ہیپی‘ کا کردار ادا کیا ہے جو اپنی شادی سے ایک رات قبل گھر سے بھاگ جاتی ہیں۔

(جاری ہے)

ٹریلر میں دکھایا گیا ہے کہ ہیپی اپنی شادی سے بھاگنے کے بعد غلطی سے پاکستان پہنچ جاتی ہیں اور وہاں ان کی ملاقات ابھے دیول سے ہوتی ہے جو واپس ہندوستان جانے میں ان کی مدد کرتے ہیں، اس دوران ہیپی کو کچھ لوگ اغوا بھی کرلیتے ہیں۔

مومل اس فلم میں ابھے دیول کی بیوی کا کردار ادا کررہی ہیں جو ہیپی کو واپس ابھے کے ساتھ ہندوستان پہنچائیں گی۔پاکستانی اداکارہ کا اس فلم میں بیحد دلکش انداز پیش کیا گیا ہے۔فلم ”ہیپی بھاگ جائے گی“ رواں سال 19 اگست کو سینما گھروں میں نمائش کے لیے پیش کی جائے گی۔