دھونی کو خریدنے کےلئے پاجامہ بھی بیچنے کو تیار ہوں:شاہ رخ خان

نئی دہلی(اردو پوائنٹ تازہ ترین اخبار27اپریل ۔2017ئ) آئی پی ایل کا 2017ءسیزن ابھی جاری ہے تاہم صحافیوں اور ٹیم مالکان کو اگلے ایڈیشن کیلئے کھلاڑیوں اور نیلامی کی فکر ابھی سے لاحق ہوگئی ہے۔انہی مالکان میں سے ایک کولکتہ نائٹ رائیڈرزکے شاہ رخ خان سے جب اگلی نیلامی میں سابق بھارتی کپتان مہندراسنگھ دھونی کو خریدنے کے حوالے سے سوال پوچھاگیاتھا تو انہوں نے حیران کن جواب دیتے ہوئے کہاکہ ” یار! میں تو اس کو پاجامہ بیچ کربھی خریدلوں ،وہ آئے تو نیلامی میں“۔

(جاری ہے)

یاد رہے کہ مہندراسنگھ دھونی اور انکی موجودہ فرنچائزرائزنگ پونے سپرجائنٹس کے مابین معاملات زیادہ اچھے نہیں نظر آرہے ، دھونی کی جگہ پہلے سٹیو سمتھ کو کپتان بنایا گیااور اب ان کی میچ وننگ پرفارمنس مسلسل کم ہونے کی باتیں ہورہی ہیں اور بعض کرکٹ ماہرین کے خیال میں یہ بھی ممکن ہے کہ ایونٹ کے اگلے ایڈیشنز کیلئے دھونی اور پونے کی راہیں جدا ہوجائیں۔واضح رہے کہ معطل آئی پی ایل فرنچائزچنائی سپرکنگز نے اپنے دونوں ٹائٹل دھونی کی قیادت میں جیتے تھے اور اب ایسا محسوس ہوتا ہے کہ آئی پی ایل کے اگلے ایڈیشن کیلئے کولکتہ نائٹ رائیڈرزکے مالک شاہ رخ خان، دھونی کی خدمات حاصل کرنے کے متمنی ہیں۔