بھارت بگ تھری کی صورت میں ملنے والے 570ملین ڈالر لینے پر بضد ،400ملین ڈالر کی آفر مسترد کردی

نئی دہلی(اُردو پوائنٹ اخبارتازہ ترین - آن لائن۔ 01 مئی2017ء) بھارتی کرکٹ بورڈ بگ تھری کی صورت میں ملنے والے مجوزہ 570 ملین ڈالر کے حصے سے ایک قدم بھی پیچھے ہٹنے کو تیار نہیں، اس نے ایک بار پھر 400 ملین ڈالر تک کی آفر کو انتہائی ناکافی قرار دیتے ہوئے رد کردیا ہے۔ آئی سی سی کی جانب سے گذشتہ دنوں منظور کردہ نئے فنانشل ماڈل کے تحت بھارت کے حصے میں 293 ملین ڈالر آتے ہیں، اگرچہ بی سی سی آئی کے اصرار پر اس معاملے پر دوبارہ ووٹنگ ہوئی اور اسے منہ کی کھانا پڑی اس کے باوجود آئی سی سی کے چیئرمین ششانک منوہر نے اجلاس سے قبل بی سی سی آئی کو اضافہ 100 ملین ڈالر دینے کی جو پیشکش کی تھی وہ بعد میں بھی برقرار رکھی جس سے اس کا ریونیو 8 برس کے دورانیے میں 400 ملین کے قریب پہنچ سکتا ہے تاہم میٹنگ میںبی سی سی آئی کی نمائندگی کرنے والے قائم مقام سیکریٹری امیتابھ چودھری کہتے ہیں کہ اس وقت انٹرنیشنل کرکٹ کونسل کا 70 فیصد ریونیو بھارتی مارکیٹ سے جاتا ہے، اس کے مقابلے میں 400 ملین ڈالر تو بہت زیادہ ہی کم ہیں جبکہ ہمیں جو 293 ملین ڈالر کا حصہ دینے کو کہا جارہا ہے یہ تو بہت ہی تھوڑا ہے، ہمارا مطالبہ ناجائز نہیں ہے، جتنی رقم کی ہمیں پیشکش کی گئی ہے اس سے کہیں زیادہ کا بھارت حقدار ہے۔

(جاری ہے)

علاوہ ازیں امیتابھ چودھری نے دعویٰ کیا کہ چیمپئنز ٹرافی میں بھارت کے شریک نہ ہونے سے سب سے زیادہ نقصان براڈ کاسٹر کا ہوگا کیونکہ ایونٹ میں دلچسپی ہی ختم ہوکر رہ جائے گی، تاہم انھوں نے واضح کیا کہ اس حوالے سے کوئی بھی فیصلہ 7 مئی کو شیڈول خصوصی جنرل میٹنگ میں ہی کیا جائے گا۔