سری لنکا کے لیجنڈ کرکٹر کمار سنگا کارا نے فرسٹ کلاس کرکٹ سے بھی ریٹائرمنٹ کا اعلان کر دیا

لندن(اُردو پوائنٹ اخبارتازہ ترین - این این آئی۔ 24 مئی2017ء) سری لنکا کے لیجنڈ کرکٹر کمار سنگا کارا نے فرسٹ کلاس کرکٹ سے بھی ریٹائرمنٹ کا اعلان کردیا۔ میڈیا رپورٹ کے مطابق کمار سنگا کارا نے کہا ہے کہ میرے اندر کا سپاہی ابھی تک زندہ ہے تاہم یہ ریٹائرمنٹ لینے کا اچھا وقت ہے ،ْانگلش کائونٹی چمپئن شپ ستمبر میں ختم ہونے کے بعد فرسٹ کلاس کرکٹ سے ریٹائر ہوجائوں گا، خوش قسمت ہوں کہ جتنا چاہا اس سے بھی زیادہ کرکٹ کھیلی، مگر زندگی میں کھیل کے علاوہ بھی کرنے کے بہت سے کام ہیں، اب اپنی فیملی کو وقت دینا چاہتا ہوں۔

(جاری ہے)

39 سالہ کرکٹر نے 134 ٹیسٹ میچز میں 57.40 کی اوسط سے 12400 رنز بنا رکھے ہیں، وہ 52 ففٹیز، 38 سنچریز کے ساتھ ٹیسٹ کرکٹ میں سب سے زیادہ رنز اسکور کرنے والے پلیئرز کی فہرست میں پانچویں نمبر پر موجود ہیں۔ انہوں نے 404 ون ڈے مقابلوں میں 41.98 کی اوسط سے 25 سنچریز اور 93 نصف سنچریز کی مدد سے 14234 رنز بنا رکھے ہیں۔ جب کہ 56 ٹی ٹوئنٹی انٹرنیشنلز میں 1382 رنز بھی ان کے کریڈٹ پر ہیں۔ انہوں نے سری لنکن ٹیم کو 2007 اور 2011 ورلڈ کپ کے فائنل میں رسائی دلوانے میں اہم کردار ادا کیا تھا اور ٹوئنٹی 20 ورلڈ کپ 2014 کی فاتح سری لنکن ٹیم کے رکن بھی تھے۔