پی سی بی نےہیڈ کوچ مکی آرتھر پر الزامات عائد کرنے پر عمر اکمل کو شوکاز نوٹس جاری کردیا

لاہور۔ (اُردو پوائنٹ اخبارتازہ ترین - اے پی پی۔ 17 اگست2017ء) قومی کرکٹ ٹیم کے مایہ ناز بلے باز عمر اکمل کو ہیڈ کوچ مکی آرتھر پر نازیبا زبان کے استعمال کا الزام لگانا مہنگا پڑ گیا،پی سی بی نے گزشتہ روز ہیڈ کوچ مکی آرتھر کیخلاف الزامات عائد کرنے پر مڈل آرڈر بلے باز عمر اکمل کو شوکاز نوٹس جاری کردیا،عمر اکمل کو شوکاز نوٹس کا جواب سات روز میں دینا ہوگا،گزشتہ روز عمر اکمل نے دعویٰ کیا تھا کہ ہیڈ کوچ مکی آرتھر نے انہیں گالیاں دیں،انہوں نے کہا کہ مکی آرتھر نے ان سے کہا کہ کرکٹ اکیڈمی میں کھیلنے کے بجائے کلب کرکٹ کھیلو،عمر اکمل کا کہنا تھا کہ غیر ضروری وارننگز دے کر انہیں کرکٹ اکیڈمی سے ڈراپ کیا گیا،دوسری جانب کوچ مکی آرتھر نے عمر اکمل کے الزامات کو مسترد کرتے ہوئے کہا تھا کہ انہوں نے کرکٹر کو کوئی گالی نہیں دی،مکی آرتھر کا کہنا تھا کہ عمر اکمل غلط بیانی کررہے ہیں، انہوں نے صرف عمر کو کارکردگی بہتر بنانے کی تلقین کی تھی،یہ پہلی مرتبہ نہیں ہے جب عمر کسی تنازعہ کی زد میں آئے ہیں،2014 میں عمر اکمل کا ایک ٹریفک وارڈن سے جھگڑا ہوگیا تھا جس کے بعد وہ ایک دن تک تھانے میں بند رہے تھے،ٹریفک وارڈن نے انہیں سگنل توڑنے پر روکا تھا جس کے بعد دونوں کے درمیان جھگڑا شروع ہوگیا،اس کے علاوہ فیصل آباد میں ایک تھیٹر کے دوران ان کا وہاں کے اہلکاروں سے بھی جھگڑا ہوگیا جبکہ حیدرآباد میں مبینہ طور پر ایک ڈانس پارٹی میں بھی پکڑے گئے،مڈل آرڈر بلے باز کو اس وقت کے ہیڈ کوچ وقار یونس کی ہدایات پر عالمی کپ 2015 کے بعد ڈراپ کردیا گیا تھا،عمر اکمل کی طرف سے مکی آرتھر پر الزامات لگانے پر سابق کرکٹرز نے بھی مخالفت کی ہے ۔