ویرات کوہلی دوروں کی ناقص منصوبہ پر اپنے بورڈ پر برہم

ناقص منصوبہ بندی کے سبب ہمارے پاس دورہ جنوبی افریقہ کی تیاریوں کیلئے بالکل بھی وقت نہیں ہو گا ،ْبھارتی کرکٹ ٹیم کے کپتان کی گفتگو بھارت کی سری لنکا سے سیریز کا اختتام 24 دسمبر کو ہو گا ،ْ بھارت اور جنوبی افریقہ کے درمیان پہلا ٹیسٹ میچ پانچ دسمبر کو کھیلا جائے گا

جمعہ 24 نومبر 2017 13:17

نئی دہلی (اُردو پوائنٹ اخبارتازہ ترین - این این آئی۔ 24 نومبر2017ء) بھارتی کرکٹ ٹیم کے کپتان ویرات کوہلی نے سخت دورہ جنوبی افریقہ سے قبل ناقص شیڈول اور منصوبہ بندی پر اپنے بورڈ پر برہمی کا اظہار کرتے ہوئے کہا ہے کہ ناقص منصوبہ بندی کے سبب ہمارے پاس دورہ جنوبی افریقہ کی تیاریوں کیلئے بالکل بھی وقت نہیں ہو گا۔بھارتی ٹیم اس وقت سری لنکا کے خلاف ٹیسٹ سیریز کھیلنے میں مصروف ہے اور ون ڈے و ٹی20 سمیت اس سیریز کے اختتام پر میزبان ملک کو مشکل دورہ جنوبی افریقہ کیلئے روانہ ہونا ہے اور اس ناقص منصوبہ بندی پر بھارتی ٹیم کے کپتان نے بورڈ حکام کو تنقید کا نشانہ بنایا۔

ویرات کوہلی نے بورڈ پر زور دیا کہ وہ مستقبل میں سیریز کی منصوبہ بندی سے قبل شیدول کا جائزہ ضرور لیں کیونکہ ایسا نہ کرنے کی صورت میں کھلاڑی غیرضروری دباؤ کا شکار ہو جاتے ہیں اور انجری کا خطرہ بھی رہتا ہے۔

(جاری ہے)

انہوں نے تسلیم کیا کہ دورہ جنوبی افریقہ کی وجہ سے ہم نے بورڈ سے درخواست کی کہ سری لنکا کے خلاف سیریز کے دوران فاسٹ باؤلرز کو معاونت فراہم کرنے والی وکتیں تیار کی جائیں تاکہ ہمیں دورے کی تیاری کا وقت مل سکے۔

بھارتی کپتان نے کہا کہ سری لنکا سے سیریز کے اختتام کے دو دن بعد ہمیں جنوبی افریقہ روانہ ہونا ہے لہٰذا ہمارے پاس اس کے علاوہ اور کوئی چارہ نہ تھا کہ ہم مستقبل میں درپیش چیلنج سے نمٹنے کی تیاری کریں ار جنوبی افریقہ جیسی وکٹوں سے ہم آہنگ ہونے کی کوشش کریں۔انہوںنے کہاکہ اگر ہمیں تیاری کیلئے ایک ماہ کا عرصہ ملتا تو ہم کیمپ لگا کر باقاعدہ اس کی تیاری کرتے تاہم ہمیں انہی حالات میں رہتے ہوئے دورے کی تیاری کرنی ہے۔

کوہلی نے کہا کہ ٹیسٹ میچ کا نتیجہ آنے کے بعد ہر کوئی کھلاڑیوں پر تنقید کے نشتر برسانے شروع کردیتا ہے لیکن میرا ماننا ہے کہ تنقید کرنا اس وقت درست ہے جب ہمیں میچ کی تیاری کیلئے بھرپور وقت دیا جائے اور اگر ہم تیاری کے باوجود بھی کارکردگی نہ دکھا سکیں تو لوگ ہم تنقید کرنے میں حق بجانب ہیں۔یاد رہے کہ بھارت کی سری لنکا سے سیریز کا اختتام 24 دسمبر کو ہو گا اور بھارت اور جنوبی افریقہ کے درمیان پہلا ٹیسٹ میچ پانچ دسمبر کو کھیلا جائے گا۔
وقت اشاعت : 24/11/2017 - 13:17:51

مزید متعلقہ خبریں پڑھئیے‎ :