دوحہ جونیئر اسکواش میں پاکستانی کھلاڑیوں نے برتری ثابت کر دی

دوحہ (اُردو پوائنٹ اخبارتازہ ترین - آئی این پی۔ 10 مارچ2018ء) پاکستانی کھلاڑیوں نے دوحہ جونیئر اسکواش چیمپئن شپ میں تمام ٹائٹلز جیت کر اپنی برتری ثابت کردی۔قطر اسکواش چیمپئن شپ میں کامیابیوں کے بعد پاکستانی نوجوانوں نے دوحا میں انڈر 13، 15، 17 اور انڈر 19 کیٹیگریز کے ایونٹس جیت لیے، دونوں چیمپئن شپس کے اختتام پر خلیفہ انٹرنیشنل اسکواش کمپلیکس، دوحا میں تقریب تقسیم انعامات منعقد ہوئی، تقریب میں قطر اسکواش فیڈریشن کے صدر سعد المہندی نے جیتنے والے کھلاڑیوں میں انعامات تقسیم کیے۔

چیمپئن شپ میں پاکستان، بھارت، قطر، مصر، ملائیشیا، اردن، آئرلینڈ، امریکہ اور ایران کے نامور کھلاڑیوں نے حصہ لیا، پاکستان کے محمد عماد نے اپنے ہموطن حریف عثمان ندیم کو 34 منٹ کے مقابلے کے بعد 7-11،11-6، 4-11 اور 6-11 سے شکست دیتے ہوئے انڈر 13 کیٹیگری کا ٹائٹل اپنے نام کیا۔

(جاری ہے)

دوسرے پاکستانی کھلاڑی جنید خان نے اعلی کارکردگی کا مظاہرہ کرتے ہوئے اپنے مخالف اردن کے کرم جمال کو انڈر 15 کیٹیگری کے 42 منٹ جاری رہنے والے فائنل میچ میں 6-11، 6-11، 11-5، 11-6 اور9-11 سے مات دی۔

اسی طرح انڈر17 کیٹیگری میں فرحان ہاشمی نے پاکستان کے ہی عزیر شوکت کو45 منٹ تک کھیلے جانے والے فائنل میں8-11، 11-8، 6-11 اور6-11 سے قابو کرکے ٹائٹل اپنے نام کرلیا۔انڈر19کیٹیگری میں پاکستان کے عباس زیب نی50 منٹ تک جاری رہنے والے اس سنسنی خیز میچ میں اپنے ہم وطن عزیر رشید کو6-11، 12-14، 11-6 اور9-11 کے اسکور سے زیر کرکے ٹرافی اپنے نام کرلی۔