کیرن پولارڈ، ڈیرن براوو اور سنیل نارائن کیلئے ٹیم میں واپسی کے دروازے کھلے ہیں، کرکٹ ویسٹ انڈیز

کنگسٹن ۔ (اُردو پوائنٹ اخبارتازہ ترین - اے پی پی۔ 24 جولائی2018ء) کرکٹ ویسٹ انڈیز کے چیف ایگزیکٹو آفیسر جوہنی گریو نے کہا ہے کہ کیرن پولارڈ، ڈیرن براوو اور سنیل نارائن کیلئے ٹیم میں واپسی کے دروازے کھلے ہیں، ہمیں خوشی ہو گی کہ تینوں کھلاڑی آئندہ برس شیڈول ورلڈ کپ میں ٹیم کا حصہ ہوں۔

(جاری ہے)

اپنے ایک بیان میں انہوں نے کہا کہ ہماری تینوں کھلاڑیوں کے ساتھ اس سلسلے میں بات چیت ہوئی جو کہ کافی مثبت رہی، کھلاڑیوں کو آگاہ کر دیا ہے کہ ٹیم میں واپسی کیلئے دروازے کھلے ہیں، رواں برس شیڈول ڈومیسٹک ون ڈے ٹورنامنٹ میں عمدہ پرفارم کر کے دوبارہ کم بیک کریں۔

انہوں نے کہا کہ ورلڈ کپ کی تیاریوں کے حوالے سے ڈومیسٹک ون ڈے ٹورنامنٹ ہمارے کھلاڑیوں کیلئے بہت اہمیت کا حامل ہے جس میں ان کے پاس اپنی خامیوں اور کمزوریوں کو دور کرنے کا موقع ہو گا۔ انہوں نے کہا کہ تینوں کھلاڑیوں میں ٹیم کو اکیلے میچ جتوانے کی صلاحیت موجود ہے، ٹیم کو بھی اس وقت ان کی ضرورت ہے اور یقینی طور پر ان کھلاڑیوں کو دوبارہ ٹیم میں دیکھ کر خوشی ہو گی۔