ٹیم سے باہر ہونےوالے محمد عامر اب کس ٹیم کی نمائندگی کریں گے ؟ جانئے

لاہور(اردو پوائنٹ اخبارتازہ ترین۔29 ستمبر2018ء) ایشیاءکپ میں مایوس کن پرفارمنس کے بعد ٹیم سے باہر ہونےوالے فاسٹ باﺅلر محمد عامر ڈومیسٹک کرکٹ میں بہترین کارکردگی دکھانے کے بعد قومی ٹیم میں کم بیک کے لیے پرامید ہیں۔ میڈیا سے بات کرتے ہوئے فاسٹ محمد عامر نے کہا کہ کیرئر میں کئی بار ایسے مواقع آتے ہیں جب کارکردگی توقع کے مطابق نہیں رہتی۔

کارکردگی میں اتار چڑھاﺅ کیر یئر کا حصہ ہے اور ہر کھلاڑی پر ایسا وقت آتا ہے اس لیے مداح افسردہ نہ ہوں۔ انشااللہ ڈومیسٹک کرکٹ میں شاندار کارکردگی دکھا کر دوبارہ ٹیم میں جگہ بنا لوں گا۔قومی ٹیم سے باہر ہونے والے فاسٹ بولر محمد عامر نے مایوسی کا شکار ہونے کے بجائے ڈومیسٹک کرکٹ میں حصہ لینے کا فیصلہ کیا ہے۔ وہ قائد اعظم ٹرافی میں سوئی سدرن گیس کی نمائندگی کریں گے جہاں ان کا پہلا سامنا سلمان بٹ کی کپتانی میں کھیلنے والی واپڈا کی مضبوط ٹیم سے ہوگا۔

(جاری ہے)

آسٹریلیا کے خلاف ٹیسٹ سیریز سے باہر ہونے والے فاسٹ بولر محمد عامر قائد اعظم ٹرافی سے قبل مزید چند روز یواے ی میں ہی اپنی فیملی کے ساتھ وقت گزاریں گے اور 7 اکتوبر کو پاکستان پہنچیں گے جس کے بعد 8 اکتوبر کو سوئی سدرن ٹیم کو جوائن کرلیں گے۔دوسری جانب سوئی سدرن گیس کی ٹیم انتظامیہ نے محمد عامر کی دستیابی کی تصدیق کرتے ہوئے بتایا کہ محمد عامر 11 اکتوبر سے شروع ہونےوالے قائد اعظم ٹرافی کے راﺅنڈ میں کھیلیں گے۔

یہ میچ مرغزار کرکٹ گراﺅنڈ میں واپڈا کے خلاف کھیلا جائے گا۔کوچ کبیر خان نے بتایا کہ عامر اسلام آباد میں ٹیم کو جوائن کریں گے اور واپڈا کے خلاف چار روزہ میچ کھیل سکیں گے۔ ان کی واپسی سے ہماری ٹیم کا بولنگ کمبی نیشن مضبوط ہوگا جب کہ ڈومیسٹک میچز کھیلنے سے عامر کو بھی بہت فائدہ ہوگا۔آسٹریلیا کے خلاف دو ٹیسٹ میچز کے بعد پاکستانی ٹیم نے تین ٹی ٹونٹی میچز 24، 26 اور 28 اکتوبر کو کھیلنا ہے اور اس وقت تک محمد عامر کے پاس بہترین موقع ہے کہ قائد اعظم ٹرافی کے 2 چار روزہ اور ایک ون ڈے میچ کھیل کر اپنی فارم اور فٹنس کا ثبوت دے کر سلیکٹرز اور ٹیم انتظامیہ کا اعتماد حاصل کرسکیں۔