دوسرا ٹیسٹ جیت کر سیریز اپنے نام کرنے کا بہترین موقع ہے، کوچ سے کوئی اختلاف نہیں تمام تر توجہ دوسرے ٹیسٹ پر مرکوز ہے، امام الحق کی جگہ فخر زمان کھیلیں گے، سرفراز احمد

پاکستان کے پاس ورلڈ کلاس بیٹسمین اور اسپنرز ہیں، دوسرا ٹیسٹ جیتنے کیلئے پوری قوت کے ساتھ میدان میں اتریں گے، ٹم پین

پیر 15 اکتوبر 2018 17:27

دوسرا ٹیسٹ جیت کر سیریز اپنے نام کرنے کا بہترین موقع ہے، کوچ سے کوئی اختلاف نہیں تمام تر توجہ دوسرے ٹیسٹ پر مرکوز ہے، امام الحق کی جگہ فخر زمان کھیلیں گے، سرفراز احمد
ابوظہبی۔ (اُردو پوائنٹ اخبارتازہ ترین - اے پی پی۔ 15 اکتوبر2018ء) پاکستانی ٹیم کے کپتان اور وکٹ کیپر بلے باز سرفراز احمد نے کہا کہ کھلاڑیوں کی کارکردگی پر انتہائی پر اعتماد ہوں، دوسرا ٹیسٹ جیت کر سیریز اپنے نام کرنے کا بہترین موقع ہے، مقصد کے حصول کیلئے کھلاڑیوں کو خوب جان لڑانا ہو گی، کوچ سے کوئی اختلاف نہیں تمام تر توجہ کینگروز کے خلاف دوسرے ٹیسٹ پر مرکوز ہے، امام الحق کی جگہ فخر زمان کھیلیں گے۔

آسٹریلوی قائد ٹم پین نے کہا کہ پاکستان کے پاس ورلڈ کلاس بیٹسمین اور اسپنرز ہیں، دوسرا ٹیسٹ جیتنے کیلئے پوری قوت کے ساتھ میدان میں اتریں گے۔ پاکستان اور آسٹریلیا کے درمیان دوسرا اور آخری ٹیسٹ (آج) منگل سے ابوظہبی میں شروع ہو گا، دونوں ٹیموں کے درمیان پہلا ٹیسٹ سنسنی خیز مقابلے کے بعد ڈرا ہو گیا تھا۔

(جاری ہے)

پیر کو پریس کانفرنس کرتے ہوئے پاکستانی قائد نے کہا کہ پہلے ٹیسٹ میں کھلاڑیوں کی کارکردگی اچھی رہی، بدقسمتی سے جیت کے قریب پہنچ کر فتح حاصل نہ کر سکے جس پر افسوس ہے، آخری دن پہلے سیشن میں وکٹ مل جاتی تو ہم میچ جیت سکتے تھے۔

انہوں نے کہا کہ بحیثیت کپتان کھلاڑیوں کی کارکردگی پر انتہائی پر اعتماد ہوں، اپنی بیٹنگ کو بہتر بنانے کیلئے سخت محنت کر رہا ہوں، امید ہے کہ میں پاکستان کیلئے اچھا پرفارم کروں گا۔ انہوں نے کہا کہ امام الحق کی جگہ فخر زمان دوسرا ٹیسٹ کھیلیں گے، ٹیسٹ میں بھی تیز کھیلنے والا کھلاڑی ہونا چاہیے، امید ہے کہ وہ روایتی کھیل پیش کر کے اپنی سلیکشن کو درست ثابت کریں گے، شاداب خان بھی مکمل فٹ ہیں اور 12 کھلاڑیوں میں شامل ہیں تاہم پلیئنگ الیون کا اعلان میچ سے قبل کیا جائے گا۔

انہوں نے کہا کوچ اور میرے درمیان کوئی اختلاف نہیں، اس بات کو ختم کر کے آگے بڑھتے ہیں اور ہماری تمام تر توجہ دوسرے ٹیسٹ پر مرکوز ہے، میچ جیت کر سیریز اپنے نام کرنے کیلئے کھلاڑیوں کو تینوں شعبوں میں خوب محنت کرنا ہو گی۔ آسٹریلوی کپتان ٹم پین نے کہا کہ پاکستان کے پاس ورلڈ کلاس بیٹسمین اور اسپنرز ہیں، میچ جیتنے کیلئے ہر کھلاڑی کو صلاحیتوں سے بڑھ کر کارکردگی دکھانا ہو گی۔
وقت اشاعت : 15/10/2018 - 17:27:53

مزید متعلقہ خبریں پڑھئیے‎ :

متعلقہ عنوان :