جنوبی افریقہ کیخلاف تین ٹیسٹ میچز کی سیریز کے لیے 16 رکنی قومی اسکواڈ کا اعلان کر دیا گیا

فاسٹ بالر محمد عامر کا نام بھی شامل ،سرفراز احمد قیادت کرینگے،پہلا ٹیسٹ 26دسمبر سے سنچورین میں کھیلا جائیگا قومی ٹیم دورہ جنوبی افریقہ کے دوران ایک تین روزہ پریکٹس میچ سمیت 3 ٹیسٹ، 5 ون ڈے اور3 ٹی ٹونٹی میچز کھیلے گی

جمعہ 7 دسمبر 2018 21:55

جنوبی افریقہ کیخلاف تین ٹیسٹ میچز کی سیریز کے لیے 16 رکنی قومی اسکواڈ کا اعلان کر دیا گیا
لاہور(اُردو پوائنٹ اخبارتازہ ترین - این این آئی۔ 07 دسمبر2018ء) پاکستان کرکٹ بورڈ نے جنوبی افریقہ کے خلاف رواں ماہ شروع ہونے والی تین ٹیسٹ میچز کی سیریز کے لیے 16 رکنی اسکواڈ کا اعلان کر دیا ہے جس میں فاسٹ بالر محمد عامر کا نام بھی شامل ہے۔تین ٹیسٹ میچز کیلئے منتخب کردہ کھلاڑیوں میں فخرزمان، اظہر علی، شان مسعود، امام الحق، بابر اعظم،اسد شفیق،حارث سہیل، سرفراز احمد(کپتان)، یاسر شاہ، شاداب خان، محمد عامر، حسن علی، محمد عباس، فہیم اشرف ، شاہین آفریدی اور محمد رضوان شامل ہیں۔

قومی ٹیم دورہ جنوبی افریقہ کے دوران ایک تین روزہ پریکٹس میچ سمیت 3 ٹیسٹ، 5 ون ڈے اور3 ٹی ٹونٹی میچز کھیلے گی۔ منتخب کرکٹرز کی روانگی 13 دسمبر کو طے ہے۔واضح رہے پاکستان کے دورہ جنوبی افریقہ کا آغاز 19 دسمبر 2018 سے ساتھ افریقہ انویٹیشن الیون کے خلاف تین روزہ میچ سے ہو گا جبکہ دونوں ٹیموں کے درمیان پہلا ٹیسٹ 26 دسمبر سے سنچورین میں کھیلا جائے گا۔

(جاری ہے)

پاکستان اور جنوبی افریقہ کے درمیان دوسرے ٹیسٹ کی میزبانی کیپ ٹائون کرے گا جبکہ تیسرا اور آخری ٹیسٹ 11 جنوری سے جوہانسبرگ میں شروع ہو گا۔پاکستان اور جنوبی افریقہ کے درمیان ایک روزہ سیریز کا آغاز 19 جنوری کو پورٹ الزبتھ سے ہو گا، دوسرا ایک روزہ میچ 22 جنوری کو ڈربن، تیسرا 25 جنوری کو سنچورین، چوتھا 27 جنوری کو جوہانسبرگ اور سیریز کا آخری میچ 30 جنوری کو کیپ ٹائون میں ہو گا۔دونوں ٹیموں کے درمیان ٹی ٹونٹیسیریز کا پہلا میچ یکم فروری کو کیپ ٹائون، دوسرا تین فروری کو جوہانسبرگ اور تیسرا میچ 6 فروری کو سنچورین میں کھیلا جائے گا۔
وقت اشاعت : 07/12/2018 - 21:55:45

مزید متعلقہ خبریں پڑھئیے‎ :