اینٹری فیس جمع نہ ہوئی ،پاکستان ورلڈ ٹیم سکواش چیمپئن شپ سے باہر

راولپنڈی(اردو پوائنٹ تازہ ترین اخبار۔ 27جولائی2019ء) پاکستان میں کھیلوں کے میدان سے ایک بری خبر سامنے آگئی، انتظامیہ کی غفلت کے باعث 40سال تک سکواش کی دنیا پرحکمرانی کرنیوالی پاکستانی ٹیم میگا ایونٹ میں حصہ نہیں لے سکے گی۔انتظامیہ کی غفلت، نااہلی اور سستی کے باعث پاکستان سکواش کی ٹیم عالمی چیمپئن شپ کا حصہ نہ بن سکی، پاکستان کی طرف سے چیمپئن شپ کی فیس ہی جمع نہ کرائی گئی۔

ورلڈ ٹیم سکواش چیمپئن شپ میں اینٹری کی آخری تاریخ 16 جولائی تھی، 5 ہزار پاﺅنڈ (تقریباً 10 لاکھ روپے) فیس جمع نہیں کرائی گئی، ورلڈ سکواش ٹیم چیمپئن شب میں 32 ممالک کی ٹیمیں حصہ لے رہی ہیں۔سکواش چیمپئن شپ 14 سے 22 دسمبر تک امریکی ریاست واشنگٹن میں کھیلا جائے گا۔ پاکستان چھ بار ورلڈ سکواش ٹیم چیمپئن شپ کا فاتح رہا ہے، 1993 ءمیں پاکستان آخری بار چیمپئن رہا، اس ایونٹ کا دفاعی چیمپئن مصر ہے۔

(جاری ہے)

دوسری جانب پاکستان سکوا ش فیڈریشن کے حکام کا کہنا ہے کہ فیڈریشن نے ٹیم پر بہت پیسا لگایا ہے لیکن سینئر کھلاڑی اپنا سو فیصد نہیں دے رہے جبکہ ہمارا ورلڈ ٹیم سکواش چیمپئن شپ میں ٹاپ 10میں آنے کا بھی کوئی چانس نہیں تھا اس لیے اتنے پیسے دینے کا کوئی فائدہ بھی نہیں تھا ۔