ہاکی کو ساﺅتھ ایشین گیمز سے نکال دیاگیا، دفاعی چیمپئن قومی ٹیم کی شرکت کا امکان ختم

لاہور(اردو پوائنٹ تازہ ترین اخبار۔17 اگست 2019ء) ہاکی شائقین کے لیے ایک اور بری خبر ہے کہ قومی ٹیم ساﺅتھ ایشین گیمز میں شرکت نہیں کرسکے گی۔یکم دسمبر سے نیپال کے دارلحکومت کھٹمنڈو میں شیڈول ساﺅتھ ایشین گیمز میں ہاکی کو شامل نہیں کیا گیا۔ ذرائع کے مطابق گیمز کے منتظمین نے ہاکی سہولیات مناسب نہ ہونے کو جواز بناکر اسے ایونٹ کا حصہ بنانے سے انکار کردیاہے۔

اب مجموعی طورپر 27 کھیلوں کے مقابلے ہوں گے جن میں ہاکی شامل نہیں ہے ۔

(جاری ہے)

پاکستان اولمپک ایسوسی ایشن کے سیکرٹری خالد محمود نے ہاکی ایونٹ کے اخراج کی تصدیق کی ہے، ان کا کہناہے کہ ہم نے چارماہ پہلے بھی ساﺅتھ ایشین گیمز کے آرگنائزر کو درخواست کی تھی کہ ہاکی کو فہرست سے نہ نکالا جائے لیکن ان کی جانب سے ہاکی ٹرف اور دوسری بنیادی ضروریات کی عدم دستیابی کو اس کو گیمز کا حصہ نہ بنانے کا موقف اختیار کیا گیا ہے۔

واضح رہے کہ 2016ءمیں منعقدہ ساﺅتھ ایشین گیمز میں پاکستان نے بھارت کو صفر کے مقابلے میں ایک گول سے ہرا کر گولڈ میڈل جیتا تھا۔