سری لنکا کیخلاف ون ڈے سیریز کیلئے قومی ٹیم کا اعلان،زخمی حسن علی ڈراپ

لاہور(اردو پوائنٹ تازہ ترین اخبار۔21ستمبر2019ء) سری لنکا کیخلاف ون ڈے سیریز کیلئے قومی ٹیم کا اعلان کردیا گیا،فاسٹ باﺅلرحسن علی زخمی ہونے کے باعث ٹیم میں جگہ بنانے میں ناکام رہے جب کہ کئی کھلاڑیوں کی قومی ٹیم میں واپسی ہوئی ہے ۔قومی ٹیم کے ہیڈ کوچ اور چیف سلیکٹر مصباح الحق نے قذافی سٹیڈیم ،لاہور میں پریس کانفرنس کے دوران ون ڈ ے سیریز کے لیے16رکنی سکواڈ کااعلان کیا ۔

ٹیم میں سرفراز احمد(کپتان) بابر اعظم (نائب کپتان) عابد علی، آصف علی، فخر زمان، حارث سہیل، محمد حسنین،افتخار احمد،عماد وسیم،امام الحق، محمد عامر،محمد نواز،محمدرضوان،شاداب خان، وہاب ریاض اور عثمان شنواری شامل ہیں۔ہیڈ کوچ مصباح الحق کا کہنا تھا کہ شعیب ملک ریٹائر ہو چکے ہیں جبکہ حسن علی کمر کی تکلیف کے باعث آرام کر رہے ہیں۔

(جاری ہے)

انہوں نے کہا کہ ون ڈے سیریز کے میچز بہت کم ہیں، ہم زیادہ سے زیادہ بلے بازوں کو موقع دینا چاہتے ہیں،عابدعلی کی ڈومیسٹک کرکٹ میں کارکردگی بہترہے اور انہوں نے اپنی فٹنس بھی بہتر بنائی ہے۔

ان کا کہنا تھا کہ فخرزمان کی ون ڈے سیریزمیں پارفارمنس بہترہے،فخرزمان اگر10اووربھی کھیلے تووہ میچ ونرثابت ہوتاہے۔ایک سوال کے جواب میں مصباح الحق کا کہنا تھا کہ اگر انہوں نے دوستی نبھانی ہوتی تو محمد حفیظ کو ٹیم کا حصہ بناتے ۔ایک اور سوال کے جواب میں انہوں نے کہا کہ احمد شہزاد اور عمر اکمل نے پی ایس ایل میں اچھی کارکردگی کا مظاہرہ کیا، انہیں ٹی ٹونٹی سیریز میں موقع دیا جائے گا۔