مصباح اوراظہر سمیت درجنوں کرکٹرز کی نوکریاں خطرے میں پڑ گئیں

لاہور(اردو پوائنٹ تازہ ترین اخبار۔ 23اکتوبر2019ء) قومی کرکٹ ٹیم کے ہیڈ کوچ مصباح الحق اور ٹیسٹ کپتان سمیت اظہرعلی سمیت درجنوں کرکٹرز کی ملازمتیں خطرے میں پڑ گئیں۔سوئی ناردرن گیس نے فوری طور پر کرکٹ مصروفیات چھوڑ کر دفتر جوائن کرنے کی ہدایت جاری کردیں، پی سی بی کی جانب سے نئے ڈومیسٹک کرکٹ سٹرکچر میں ڈپارٹمنٹل ٹیمیں ختم کیے جانے کے بعد کئی کرکٹرز فارغ ہوچکے ہیں جب کہ دیگر کی ملازمتیں داﺅپر لگی ہیں۔

ہیڈ کوچ اور چیف سلیکٹر مصباح الحق ،ٹیسٹ کپتان اظہر علی ، اسد شفیق، فاسٹ باﺅلر محمد عباس، لیگ سپنرشاداب خان،پیسر موسٰی خان ،وکٹ کیپر بلے باز محمد رضوان ،آ ل راﺅنڈر افتخار احمد ،لیگ سپنر یاسر شاہ ،فاسٹ باﺅلر شاہین آفریدی اورآل راﺅنڈر محمد حفیظ سوئی ناردرن گیس کے ملازم ہیں۔

(جاری ہے)

ان میں سے محمد حفیظ کو چھوڑ کر باقی 10کرکٹرز آسٹریلیا جانے والے قومی سکواڈ میں بھی شامل ہیں۔

علاوہ ازیں بھی محکمہ کے کئی کرکٹرز ڈومیسٹک مقابلوں میں شریک ہیں، سب کو فوری طور پر دفتر جوائن کرنے کی ہدایت کرتے ہوئے کہا گیا کہ اگر 28 اکتوبر تک نہ آئے تو تنخواہ روک لی جائے گی۔ یاد رہے کہ قومی ٹی ٹونٹی سکواڈ26اکتوبر کو آسٹریلیا روانہ ہوگا اور تین میچوں کی ٹی ٹونٹی سیریز3نومبر سے شروع ہوگی۔