کراچی، سمندری پانی گولف کلب میں داخل

کراچی (اردو پوائنٹ تازہ ترین اخبار۔ 28اکتوبر2019ء) سمندری طوفان ”کیار“کی وجہ سے پانی کی سطح بڑھ گئی جس کی وجہ سے سمندری پانی ڈی ایچ اے گولف کلب اور کراچی بوٹ کلب میں داخل ہوگیا ہے۔ذرائع کے مطابق سمندری طوفان کی وجہ سے پانی کی سطح بڑھ گئی جس کی وجہ سے کراچی کے ساحلی پٹی زیر آب آگئی، ڈی ایچ اے گولف کلب کورس کے ہول نمبر چھ، سات اور آٹھ میں پانی بھر آیا۔

ڈی ایچ اے گولف کلب کے کیپٹن کرنل زاہد اقبال کا کہنا ہے کہ 6 سے 500میٹر کا حصہ زیر آب آیا ہے جو فی الحال کھیل کے قابل نہیں، پہلی بار گولف میں پانی داخل ہوا ہے۔

(جاری ہے)

سندھ گولف ایسوسی ایشن کے صدر اسد آئی خان کا کہنا ہے کہ سمندری پانی سے گولف کلب کی گراس بھی خراب ہوگی اور اس کو ٹھیک کرنے میں وقت لگے گا پانی چلا بھی گیا تو نمکین پانی کی وجہ سے گراس بری طرح متاثر ہوگی، گولف کلب کے ساتھ ساتھ کراچی بوٹ کلب بھی زیر آب آگیا۔

بوٹ کلب میں پانی پارکنگ ایریا تک داخل ہوگیا جس کا پانی نکالنے کی کوشش کی جارہی ہے۔ذرائع کا کہنا ہے بوٹس کو کوئی نقصان نہیں ہوا۔