وقار یونس کے مشورے عمران خان کے کام آگئے

مشورے کی وجہ سے حریف بیٹسمینوں کی کمزوریوں کو بھانپ لیا تھا:پیسر

Zeeshan Mehtab ذیشان مہتاب بدھ نومبر 12:15

وقار یونس کے مشورے عمران خان کے کام آگئے
پرتھ(اردو پوائنٹ تازہ ترین اخبار۔13نومبر2019ء) پاکستانی کرکٹ ٹیم کے بولنگ کوچ اور سابق فاسٹ بالر وقار یونس کے مشورے عمران خان سینئر کے کام آگئے۔پرتھ میں آسٹریلیا ”اے“ کے خلاف 3 روزہ ٹور میچ میں بھرپور فارم میں نظر آنے والے پیسر عمران خان سینئر کا کہنا ہے کہ بولنگ کوچ وقار یونس نے لائن اور لینتھ پر گیند کرتے ہوئے رنز کا حصول مشکل بنانے کا مشورہ دیا تھا، اسے پیش نظر رکھتے ہوئے آف سٹمپ پر گیندیں کرتا رہا کیوں کہ حریف بیٹسمینوں کی کمزوریوں کو بھانپ لیا تھا اس لیے 5 وکٹیں حاصل کرنے میں کامیاب رہا۔

(جاری ہے)

انہوں نے کہا کہ گزشتہ ایک ہفتہ کے دوران آسٹریلیا میں کیے جانے والے نیٹ سیشنز میں مقامی صورتحال سے ہم آہنگ ہونے کا اچھا موقع ملا جب کہ انٹرنیشنل کرکٹ کے طویل وقفے میں اپنی بولنگ اور فٹنس میں بہتری لانے کے لیے کام کیا اور ڈومیسٹک سیزن میں بھی دائیں اور بائیں ہاتھ کے بیٹسمینوں کو گیندیں کرواتے ہوئے اپنی تکنیک بہتر بنانے کی کوشش کی اس کا فائدہ بھی ہوا ہے۔عمران خان سینئر نے یہ بھی کہا کہ ٹور میچ میں بہتر کارکردگی خوش آئند ہے، اپنی فارم کا یہ سلسلہ آسٹریلیا کے خلاف ٹیسٹ میچز میں بھی برقرار رکھنے کے لیے پرعزم ہوں۔         





مزید متعلقہ خبریں پڑھئیے‎ :

وقت اشاعت : 13/11/2019 - 12:15:25

Your Thoughts and Comments