قطر ٹی10 لیگ میں کرپشن کی تحقیقات کا آغاز

لاہور(اردو پوائنٹ تازہ ترین اخبار۔18 دسمبر2019ء) قطر ٹی10 لیگ کے حوالے سے انٹر نیشنل کرکٹ کونسل(آئی سی سی) کے اینٹی کرپشن یونٹ نے تحقیقات شروع کر دیں۔پاکستان کے سابق کپتان سلمان بٹ،وکٹ کیپر بلے باز کامران اکمل،سابق ٹی ٹونٹی کپتان محمد حفیظ سمیت کئی غیر ملکی کرکٹرزاس ایونٹ میں شریک ہوئے تاہم سابق کپتان سرفراز احمد کو آخری لمحات میں جانے سے روک دیا گیا تھا۔

(جاری ہے)

آئی سی سی اینٹی کرپشن یونٹ کے جنرل منیجر الیکس مارشل کا کہنا ہے کہ منتظمین کا پلان اور ٹھوس معلومات دیکھتے ہوئے قطرٹی 10 لیگ کی منظوری دی گئی تھی۔ ایونٹ کے آغاز سے چند روز قبل منتظمین اور ٹیموں میں تبدیلیوں نے چیزیں مشکوک بناتے ہوئے ہمارے کان کھڑے کر دیے، اس لئے کڑی نگرانی کا فیصلہ کیا۔الیکس مارشل نے کہا کہ ہم قطر اور دنیا بھر میں سرگرم کرپٹ عناصر کی لیگ کے دوران فکسنگ سرگرمیوں کی راہ میں رکاوٹ بنے، اس معاملے میں مزید تحقیقات کا سلسلہ جاری رکھے ہوئے ہیں۔