بھارت کو دوسرے اور آخری ٹیسٹ میچ میں بھی شکست دیکر سیریز اپنے نام کریں گے، ٹرینٹ بولٹ

کرائسٹ چرچ ۔ (اُردو پوائنٹ اخبارتازہ ترین - اے پی پی۔ 28 فروری2020ء) نیوزی لینڈ کرکٹ ٹیم کے مایہ ناز فاسٹ بائولر ٹرینٹ بولٹ نے کہا ہے کہ بھارتی ٹیم کو دوسرے اور آخری ٹیسٹ میچ میں بھی شکست دیکر دو میچوں کی سیریز 2-0 سے اپنے نام کریں گے، انہوں نے کہا کہ بھارت کو پہلے ٹیسٹ میچ میں شکست دینے کے بعد ٹیم کے حوصلے بلند ہوئے ہیں، انہوں نے کہا کہ انکی ٹیم مکمل طور پر فٹ اور بھر پور فارم میں ہے اور بھارت کے خلاف دوسرے ٹیسٹ میچ کے لئے میدان میں اترنے کو بے تاب ہے۔

اپنے ایک بیان میں انہوں نے کہا کہ وہ دو میچوں کی سیریز کے پہلے ٹیسٹ میچ میں اپنی کارکردگی سے مطمئن ہیں۔ انہوں نے کہا کہ زیادہ خوشی اس بات کی ہوئی کہ بھارت کا آئی سی سی ورلڈ ٹیسٹ چیمپئن شپ میں مسلسل فتوحات کے تسلسل کو انکی ٹیم نے توڑا ہے۔

(جاری ہے)

بولٹ نے کہاکہ انکی ٹیم نے مہمان ٹیم کے خلاف دوسرے ٹیسٹ میچ کیلئے حکمت عملی تیار کر رکھی ہے۔ انہوں نے کہا کہ بھارت سے پہلا میچ جیتنے کے باوجود دوسرے میں آسان نہیں لیں گے۔

انہوں نے کہا کہ وہ مہمان ٹیم کے خلاف دوسرے اور آخری میچ میں بھی شاندار کارکردگی کا مظاہرہ کرتے ہوئے اپنی ٹیم کی فتح میں اہم کردار ادا کریں گے۔ انہوں نے اپنی ٹیم کو خبر دار کیا ہے کہ مشن کلین سویپ مکمل کرنے کے لئے تینوں شعبوں میں سو فیصد کارکردگی کا مظاہرہ کرنا ہوگا۔ نیوزی لینڈ نے بھارت کو دو ٹیسٹ میچون کی سیریز کے پہلے ٹیسٹ میچ میں 10 وکٹوں سے شکست دیکر سیریز میں 1-0 کی برتری حاصل کر رکھی ہے۔ واضح رہے کہ نیوزی لینڈ اور بھارت کے درمیان دوسرا اور آخری ٹیسٹ میچ ہفتہ سے کرائسٹ چرچ میں شروع ہوگا۔