فٹبال ورلڈ کپ کی میزبانی کیلئے کوئی رشوت نہیں دی ، قطر نے امریکی الزام مسترد کردیا

لندن(اُردو پوائنٹ اخبارتازہ ترین - آن لائن۔ 09 اپریل2020ء) قطر میں 2022 کے ورلڈ کپ کے منتظمین نے امریکی جسٹس ڈپارٹمنٹ کے ٹورنامنٹ کی میزبانی حاصل کرنے کے لیے ووٹ حاصل کرنے کے لیے رشوت دینے کے الزامات کی سختی سے تردید کردی۔ روس میں 2018 کا فیفا ورلڈ کپ اور 2022 کو قطر میں ہونے والے ٹورنامنٹ کے حوالے سے فیفا کی ایگزیکٹو کی 2010 میں ہونے والی ووٹنگ پر افواہیں طویل عرصے سے چل رہی ہیں۔

تاہم پیر کے روز پہلی مرتبہ پراسیکیوٹر نے دونوں ٹورنامنٹس کے بارے میں باضابطہ الزامات عائد کیے۔پراسیکیوٹر کے مطابق روس اور قطر کے لیے کام کرنے والے نمائندوں نے فیفا کی ایگزیکٹو کمیٹی کے عہدیداروں کو عالمی فٹ بال کی گورننگ باڈی کے اہم میزبانی فیصلوں میں ووٹ تبدیل کرنے کے لیے رشوت دی۔

(جاری ہے)

قطر کی سپریم کمیٹی برائے ڈلیوری اینڈ لیگیسی (ایس سی) نے ان الزامات کو مسترد کردیا۔

ان کا کہنا تھا کہ وہ ایک طویل المدتی کیس کا حصہ ہیں، جس کا موضوع 2018/2022 فیفا ورلڈ کپ کی بولی کا عمل نہیں ہے۔انہوں نے کہا کہ برسوں تک جھوٹے دعووں کے باوجود یہ قطر نے فیفا ورلڈ کپ 2022 کی میزبانی غیر اخلاقی طور پر یا فیفا کے بولی کے قواعد کے بر خلاف حاصل کی اس کا ثبوت پیش نہیں کرسکے۔اگرچہ فیفا نے قطر کی بولی کے عمل کے بارے میں میڈیا کے سابقہ الزامات پر ردعمل ظاہر کیا ہے اور کہا ہے کہ ٹورنامنٹ پر اس سے کوئی اثر نہیں پڑے گا تاہم امریکی الزامات نومبر اور دسمبر 2022 کو شیڈول ٹورنامنٹ کی میزبانی پر مزید سوالات کا باعث بنیں گے۔

الزامات میں کہا گیا ہے کہ فیفا کی 2010 کی ایگزیکٹو کمیٹی کے جنوبی امریکا کے 3 اراکین، برازیل کے ریکارڈو تیکسیرا، پیراگوئے کے مرحوم نکولس لیوز اور ایک نامعلوم شریک سازشی کارکن نے 2022 ٹورنامنٹ کی میزبانی کے لیے قطر کو ووٹ دینے کے لیے رشوت لی تھی۔ڈپارٹمنٹ آف جسٹس نے یہ بھی الزام لگایا ہے کہ اس وقت کے فیفا کے نائب صدر جیک وارنر کو روس کو ووٹ دینے کے لیے مختلف شیل کمپنیوں کے ذریعہ 50 لاکھ ڈالر ادا کیے گئے تھے ، تاکہ وہ ورلڈ کپ کی میزبانی کریں۔