ثانیہ کو دھونی اور شعیب ملک میں مماثلت دکھائی دینے لگی

حیدر آباد دکن (اردو پوائنٹ تازہ ترین اخبار۔28اگست 2020ء )  پاکستانی کرکٹر شعیب ملک اور بھارتی ٹینس سٹار ثانیہ مرزا کی شادی 2010ء میں ہوئی تھی، تاہم یہ جوڑی اب بھی میڈیا کی زینت بنی ہوئی ہے۔ حال ہی میں 33 سالہ ثانیہ مرزا نے ایک انٹرویو میں بتایا ہے کہ ان کی 38 سالہ شعیب ملک سے ملاقاتوں کا سلسلہ پاکستان اور بھارت کے درمیان ہونے والے میچوں کے دوران شروع ہوا تھا۔

ان کا کہنا تھا کہ وہ شعیب ملک پر واضح کرچکی تھیں کہ وہ ہمیشہ بھارت کے ساتھ مخلص رہیں گی جس پر شعیب ملک کہتے تھے کہ ان کا بھارت کے خلاف ریکارڈ شاندار ہے اور انہیں بھارت کے خلاف کھیلنے میں مزہ آتا ہے۔ ثانیہ مرزا کو 39 سالہ سابق بھارتی کپتان مہندرا سنگھ دھونی اور اپنے شوہر شعیب ملک کے درمیان مماثلت دکھائی دیتی ہے۔

(جاری ہے)

ثانیہ مرزا نے کہا کہ کئی چیزیں دونوں میں ایک جیسی ہی ہیں، دونوں ہی کرکٹ فیلڈ میں انتہائی پرسکون رہتے ہیں۔

ثانیہ نے کہا کہ دھونی کو خاموشی سے ریٹائرمنٹ کا اعلان کرنے کے بجائے شایان شان انداز میں کھیل کو الوداع کہنا چاہیے تھا، وہ ایک بڑے سٹار ہیں اور انھوں نے بہت زیادہ کامیابیاں حاصل کیں ہیں۔