جیمز اینڈرسن کو میڈیم پیسر کہنے پر شعیب اختر ٹرولز کے نشانے پر آگئے

لاہور (اردو پوائنٹ تازہ ترین اخبار۔28اگست 2020ء ) انگلینڈ کرکٹ ٹیم کے پیسر اور مایہ ناز باؤلر جیمز اینڈریسن نے پاکستان کیخلاف تیسرے ٹیسٹ کے 5ویں روز نیا ریکارڈ قائم کردیا،وہ ٹیسٹ کرکٹ میں 600 وکٹس لینے والے دنیا کے واحد باؤلر بن گئے ہیں۔ پاکستان کے سابق فاسٹ باؤلر شعیب اختر نے 38 سالہ جیمز اینڈرسن کےاس اعزاز پر اس انداز میں تعریف کی کہ سوشل میڈیا صارفین نے شعیب پر ہی تنقید شروع کردی۔

45 سالہ شعیب اختر نے اپنی ٹویٹر پوسٹ میں لکھا کہ”جیمز اینڈرسن کی جانب سے ناقابل یقین 600 وکٹیں ایک حیران کن اعزاز ہے،ایک میڈیم پیسر کیلئے 156 میچز میں یہ اعزاز چھوٹا نہیں ہے‘‘۔ سوشل میڈیا صارفین کا شعیب اختر کی جانب سے جیمز اینڈرسن کو میڈیم پیسر کہنا ایک آنکھ نہ بھایا اور انہوں نے سوشل میڈیا پر شعیب کو ٹرول کرنا شروع کردیا اور یہاں تک کہہ ڈالا کہ جیمز اینڈرسن آپ سے بہتر ہیں۔

(جاری ہے)

جگسن لارنس نامی ایک سوشل میڈیا صارف نے لکھا کہ ” آپ کسی کی ٹھیک طرح سے تعریف بھی نہیں کرسکتے، ان کا کیریئر 20 سال کا ہے، کم بولتے ہیں 600 وکٹیں لے چکے ہیں ، تھوڑی عزت دینے سے کوئی نقصان نہیں پہنچتا‘‘۔ فیصل خان نے لکھا کہ ” جیمز اینڈرسن کو میڈیم بول کر ایک بار پھر اپنے آپ کو فاسٹ بولیں‘‘۔ فارس نامی ایک صارف نے کہا کہ” چاہے میڈیم ہو یا فاسٹ سچ پوچھیں تو اینڈرسن آپ سے بہتر ہیں‘‘۔ سلمان رفیق نامی ایک شخص نے طنزیہ انداز میں کہا کہ”سپنر ہے وہ تو بھائی گوگلی مارتا ہے‘‘۔