عثمان خواجہ پاکستان سپر لیگ کھیلنے کے خواہاں

سڈنی (اردو پوائنٹ تازہ ترین اخبار ۔ 5 ستمبر 2020ء ) آسٹریلین کرکٹ ٹیم میں جگہ بنانے میں مشکلات کا شکار ٹاپ آرڈر بیٹسمین عثمان خواجہ، اپنی جائے پیدائش پاکستان واپس لوٹنے اور پاکستان سپر لیگ (پی ایس ایل) میں شرکت کے خواہشمند ہیں۔عثمان خواجہ دنیا بھر میں ٹی ٹونٹی لیگز کھیلنے کے مواقع کی تلاش میں ہیں اور پی ایس ایل بھی ان کی اس لسٹ میں شامل ہے۔

ایک انٹرویو میں 33 سالہ عثمان خواجہ میں کہنا تھا کہ وہ آئی پی ایل اور انگلش ٹی ٹونٹی لیگز کھیل چکے ہیں لیکن انہیں ابھی تک پی ایس ایل یا کیریبئن پریمیئر لیگ کھیلنے کا موقع نہیں ملا ہے تاہم اگر انہیں یہ موقع ملا تو وہ اس سے فائدہ اٹھائیں گے۔ عثمان خواجہ کے مطابق انہیں احساس ہے کہ پاکستان میں ان کےچاہنےوالے موجود ہیں اور وہ پاکستانی شائقین کے سامنے کھیلنا پسند کریں گے۔

(جاری ہے)

عثمان خواجہ کا کہنا تھا کہ ان کے اہل خانہ کا تعلق پاکستان سے ہے اور وہ ایک دن وہاں جانا پسند کریں گے کیوں کہ وہ گزشتہ 11،12 سال سے پاکستان نہیں گئے ہیں ۔ ان کا کہنا تھا کہ وہ پاکستان جاکر اپنے چاہنے والوں سے ملاقات کرنا پسند کریں گے۔