زخمی آسٹریلوی آل رائونڈر مچل مارش آئی پی ایل سے باہر

مچل مارش رائل چیلنجرز بنگلور کیخلاف میچ کے دوران ٹخنے کی انجری کا شکار ہوئے تھے،جیسن ہولڈر ان کی جگہ سنبھالیں گے

Zeeshan Mehtab ذیشان مہتاب بدھ ستمبر 17:11

زخمی آسٹریلوی آل رائونڈر مچل مارش آئی پی ایل سے باہر
(اردو پوائنٹ تازہ ترین اخبار ۔ 23 ستمبر 2020ء ) سن رائزرز حیدرآباد کے آسٹریلوی آل رائونڈر مچل مارش زخمی ہونے کے باعث آئی پی ایل سے باہرہوگئے ہیں۔28 سالہ مچل مارش رائل چیلنجرز بنگلور کے خلاف میچ کے دوران گیند کرواتے ہوئے ٹخنے کی انجری کا شکار ہوئے تھے جس کے بعد اب وہ آئی پی ایل سے باہر ہوگئے ہیں، ان کی جگہ ویسٹ انڈین ٹیسٹ کپتان جیسن ہولڈر کو سن رائزرز حیدرآباد کے سکواڈ میں شامل کرلیا گیا ہے۔

یاد رہے کہ بھارتی کرکٹ بورڈ کے زیراہتمام انڈین پریمیر لیگ (آئی پی ایل) کا 13 واں ایڈیشن متحدہ عرب امارات میں 19 ستمبر سے شروع ہوچکا ہے ، انڈین پریمیر لیگ کے فائنل سمیت تمام میچز یو اے ای کے 3 مقامات دبئی، شارجہ اور ابوظہبی میں کھیلے جائیںگے، لیگ کا فائنل میچ 10 نومبر کو کھیلا جائیگا اور لیگ میں فائنل سمیت 53 میچز کھیلے جائیںگے۔

(جاری ہے)

ٹورنامنٹ انتظامیہ کے مطابق یہ ایونٹ رواں سال 29 مارچ سے بھارت میں شیڈول تھا لیکن عالمی وبا کورونا وائرس کی وجہ سے 15 اپریل تک ملتوی کر دیا گیا تھا۔

ہندوستانی وزیر اعظم نریندر مودی کے 14 اپریل کو اس اعلان کے بعد کہ بھارت میں لاک ڈاون کم ازکم 3 مئی 2020ء تک جاری رہیگا، بی سی سی آئی نے ٹورنامنٹ کو غیر معینہ مدت کیلئے معطل کردیا۔ 2 اگست 2020ء کو اس بات کی تصدیق ہوگئی کہ یہ ٹورنامنٹ 19 ستمبر سے 10 نومبر 2020ء کے درمیان متحدہ عرب امارات میں کھیلا جائیگا۔ واضح رہے کہ 2014ء میں ہندوستان میں انتخابات کی وجہ سے آئی پی ایل کا آدھا سیزن یواے ای منتقل ہوگیا تھا یوں متحدہ عرب امارات اس سے قبل 2014ء میں آئی پی ایل کے میچز کی میزبانی کرچکا ہے۔

آئی پی ایل کے 13 ویں ایڈیشن میں 8 ٹیمیں ٹائٹل کے حصول کیلئے پنجہ آزمائی کرینگی۔ ممبئی انڈینز کی ٹیم لیگ میں ٹائٹل کا دفاع کریگی۔ ممبئی انڈینز کی ٹیم سب سے زیادہ 4 مرتبہ لیگ کا ٹائٹل اپنے نام کرچکی ہے۔ لیگ کا پہلا ایڈیشن 2008ء میں کھیلا گیا تھا جو راجستھان رائلز نے جیتا تھا۔ شین واٹسن راجستھان رائلز کی قیادت کی تھی۔ لیگ میں اب تک بھارت کے ویرات کوہلی 5412 رنز کیساتھ ٹاپ سکورر جبکہ سری لنکا کے فاسٹ بائولر لاستھ مالنگا نے 170 وکٹوں کیساتھ سب سے زیادہ وکٹ حاصل کی ہیں۔

مزید متعلقہ خبریں پڑھئیے‎ :

وقت اشاعت : 23/09/2020 - 17:11:30

Your Thoughts and Comments