برطانوی فٹبال سپر سٹار مارکس رشفورڈ شاہد آفریدی کے گن گانے لگے

لندن (اردو پوائنٹ تازہ ترین اخبار ۔ 28اکتوبر 2020ء ) مانچسٹر یونائیٹڈ کے سٹرائیکر مارکس رشفورڈ لیجنڈری پاکستانی آل راؤنڈر شاہد آفریدی کے گن گانے لگے ۔ مارکس رشفورڈ نے ان خیالات کا اظہار اس وقت کیا جب قومی ٹیم کے سابق کپتان شاہد آفریدی نے اعلان کیا کہ ان کی فائونڈیشن رشفورڈ کی مہم ’’no child goes hungry‘‘ کی مدد کرے گی۔ 40 سالہ شاہد خان آفریدی نے بتایا کہ شاہد آفریدی فاؤنڈیشن کو نصف مدت کے دوران ملنے والے تمام عطیات سائوتھ ہال ، کیمڈن اور ہیکنی وک میں بچوں کو کھانا کھلانے کے لئے استعمال کیے جائیں گے۔

(جاری ہے)

آفریدی کا شکریہ ادا کرتے ہوئے رشفورڈ نے ٹویٹر پر ان جگہوں کی تصدیق کی جہاں بچوں کو کھانا مل سکتا ہے۔ واضح رہے کہ 22 سالہ راشفورڈ برطانیہ میں بچوں کی غذائی قلت کے مسئلے کو ختم کرنے کے بارے میں بے حد آواز بلند کررہے ہیں، برطانوی فٹبالر مارکس رشفورڈ نے 2016ء سے اب تک برطانوی فٹ بال ٹیم کے لیے 40 میچز میں 11 گولز بھی سکور کررکھے ہیں جب کہ مانچسٹر یونائیٹڈ کے لیے 147 میچز میں 46 مرتبہ گیند کو گول پوسٹ میں پہنچا چکے ہیں۔