پاکستان سکواش فیڈریشن کی 47ویں سالانہ جنرل کونسل کا اجلاس، سندھ اور خیبر پختونخوا کے نائب صدور کا انتخاب

اسلام آباد (اُردو پوائنٹ اخبارتازہ ترین - اے پی پی۔ 26 نومبر2020ء) پاکستان سکواش فیڈریشن کی 47ویں  سالانہ جنرل کونسل کا اجلاس جمعرات کو  ائیر ہیڈ کوارٹرز اسلام آباد میں ہوا۔اجلاس پاک فضائیہ کے سربراہ ائیر چیف مارشل مجاہد انور خان جوکہ پاکستان سکواش فیڈریشن کے صدر بھی ہیں کی صدارت میں ہوا۔اجلاس میں اسکواش کے عظیم کھلاڑیوں کے علاوہ صوبائی سکواش ایسوسی ایشنز اور پاکستان اسپورٹس بورڈ کے ممبران نے بھی شرکت کی۔

جنرل کونسل ممبران سے خطاب کرتے ہوئے ائیر چیف نے تمام شرکا کا شکریہ ادا کیا اور سکواش کے کھیل کی ترویج کے لئے پاک فضائیہ اور پاکستان اسکواش فیڈریشن کے مکمل تعاون کا یقین دلایا۔  انہوں نے ایسوسی ایشنزکے ممبران پر زور دیتے ہوئے کہا کہ وہ با قاعدگی سے تربیتی کیمپوں اور ٹورنامنٹس کے انعقاد کے ذریعے اسکواش کو فروغ دینے کے ساتھ ساتھ مختلف سپانسر شپ اور سکالر شپ پروگراموں کے ذریعے کھلاڑیوں کی حوصلہ افزائی کریں۔

(جاری ہے)

انہوں نے کھلاڑیوں کو قومی اور بین الاقوامی سطح پر بہتر نتائج کے حصول کے لیے کھیل پر توجہ دینے اور اپنی ذہنی اور جسمانی استعداد کاربڑھانے کی بھی تاکید کی۔جنرل کونسل نے سال 2019-2020 میں پاکستانی کھلاڑیوں کی قومی اور بین الاقوامی مقابلوں میں کارکردگی کا بھی جائزہ لیا۔  صدر پاکستان سکواش فیڈریشن نے اسکواش کے کھیل کو ترقی دینے کیلئے گراں قدر خدمات سر انجا م دینے پر پنجاب اسکواش ایسوسی ایشن کو پرائڈ آف پرفارمنس ٹرافی سے نوازا جبکہ خیبر پختونخوا  اسکواش ایسوسی ایشن رنر اَپ کی حقدار ٹھری۔

نائب صدور کی تقرری کے لئے بھی اس اجلاس کے دوران انتخابات کا انعقاد کیا گیا۔  قمر زمان کو  خیبر پختونخوا  اسکواش ایسوسی ایشن کی طرف سے جبکہ عدنان اسد کو سندھ اسکواش ایسوسی ایشن کی طرف سے متفقہ طور پر اگلے چارسال کیلئے نائب صدر منتخب کر لیا گیا۔ یہ اجلاس اسکواش کے بین الاقوامی میدان میں پاکستان کی برتری کو بحال کرنے کی امید کے ساتھ اختتام پذیر ہوا۔ پاکستان اسکواش فیڈریشن کے صدر نے فیڈریشن کے ممبران پر زور دیا کہ وہ پاکستان میں اسکواش کی ترقی میں اپنے کردار کو جاری رکھیں گے اور کھلاڑیوں کو سپانسر کرنے کے لیے بھرپور فنڈز مہیا کرنے کے لیے اپنی کاوشیں جاری رکھیں گے۔