ایک اور کھلاڑی کرونا کا شکار، انگلینڈ اور سائوتھ افریقہ کا پہلا ون ڈے میچ ملتوی

کیپ ٹائون(اُردو پوائنٹ اخبارتازہ ترین - این این آئی۔ 04 دسمبر2020ء) جنوبی افریقہ کی ٹیم کے ایک کھلاڑی کے کورونا وائرس کا شکار ہونے کے بعد انگلینڈ اور جنوبی افریقہ کے درمیان پہلے ون ڈے میچ کو ٹاس سے محض ایک گھنٹہ قبل ملتوی کردیا گیا۔جنوبی افریقہ کی ٹیم کے ایک کھلاڑی کا کورونا کا ٹیسٹ مثبت آ گیا اور اس بات کا عندیا ملا کہ ٹی20 میچوں کے دوران کھلاڑیوں نے پروٹوکولز کی خلاف ورزی کی۔

جمعہ کی دوپہر دونوں ٹیموں کے کھلاڑیوں اور اسٹاف کے ایک مرتبہ پھر ٹیسٹ کیے گئے تاکہ سیریز کا اتوار کو آغاز ہو سکے۔کرکٹ جنوبی افریقہ کی جانب سے جاری بیان میں کہا گیا کہ ون ڈے سیریز سے قبل جمعرات کو کیے گئے کورونا کے ٹیسٹ کے دوران جنوبی افریقہ ٹیم کے ایک کھلاڑی کا ٹیسٹ مثبت آ گیا جس کے نتیجے میں یہ فیصلہ کیا گیا۔

(جاری ہے)

انہوں نے کہا کہ دونوں ٹیموں، میچ ریفری اور میچ سے منسلک دیگر افراد کی حفاظت کو یقینی بنانے کے لیے کرکٹ جنوبی افریقہ کے قائم مقام چیف ایگزیکٹو آفیسر کگندری گوویندر کے ساتھ ساتھ انگلش کرکٹ بورڈ کے چیف ایگزیکٹو آفیسر ٹام ہیریسن نے سیریز کے پہلے ون ڈے میچ کو اتوار تک ملتوی کرنے پر اتفاق کیا۔

جب خبر پہنچی تو انگلینڈ کی ٹیم میچ سے قبل اپنی تیاریوں کے سلسلے میں پہلے ہی اسٹیڈیم پہنچ چکی تھی البتہ انہیں فوری طور پر کیپ ٹان کے مقامی ہوٹل میں بائیو سیکیور ببل میں پہنچا دیا گیا۔اس کے بعد ڈیوڈ ملر اور ایندائل فلکوایو سمیت جنوبی افریقہ کی ٹیم کے کھلاڑیوں اور سپورٹ اسٹاف کا ایک گروپ تیاریوں کے سلسلے میں اسٹیڈیم پہنچا لیکن انہیں بھی فورا اسٹیڈیم سے واپس بھیج دیا گیا۔

اب جنوبی افریقہ اور انگلش کرکٹ بورڈز نے سیریز کے اگلے تینوں میچز بالترتیب اتوار، پیر اور بدھ کو منعقد کرنے کا فیصلہ کیا ہے۔جب جنوبی افریقی بورڈ کے قائم مقام سربراہ سے پوچھا گیا کہ اگر مزید مثبت کیسز آئے تو سیریز کا انعقاد ہو گا یا نہیں تو انہوں نے کوئی حتمی جواب دیے بغیر کہا کہ اس بارے میں فیصلہ طبی ماہرین سے مشورے کے بعد کیا جائے گا۔

رپورٹس کے برعکس انہوں نے کہا کہ انفیکشن کا شکار ہونے والے کھلاڑیوں کا کسی اور کھلاڑی سے رابطہ نہیں ہوا جبکہ بورڈ کے ترجمان نے پروٹوکول کی خلاف ورزی کی رپورٹس بھی یکسر مسترد کردیں۔واضح رہے کہ کیپ ٹان اور اس کے گرد و نواح میں حالیہ عرصے میں کیسز میں تیزی سے اضافہ ہوا ہے اور اس علاقے میں 10 ہزار سے زائد فعال کیسز موجود ہیں۔اس سے قبل بھی دو جنوبی افریقی کھلاڑیوں کے کورونا کے ٹیسٹ مثبت آئے تھے جس کے سبب وہ ٹی20 سیریز میں شرکت نہیں کر سکے تھے۔

دوسری جانب انگلش ٹیم کے کھلاڑیوں نے پروٹوکول کی خلاف ورزی کی رپورٹس پر اپنے تحفظات کا اظہار کیا اور وہ 24 گھنٹے میں لگاتار دو ون ڈے میچز کھیلنے کے حوالے سے بھی ہچکچاہٹ کا مظاہرہ کر رہے ہیں۔اس معاملے پر جلد ہی انگلینڈ کے ٹیم ڈائریکٹر ایشلے جائلز اپنا بیان جاری کریں گے جس کے بعد صورتحال مزید واضح ہو سکے گی۔دوسری جانب انگلینڈ کے خلاف سیریز کے لیے کرکٹ ساوتھ افریقہ نے نئی تاریخوں کا اعلان کردیا ہے جس کے مطابق پہلا ون ڈے 6 دسمبر، دوسرا 7 دسمبر اور تیسرا ون ڈے 9 دسمبر کو کھیلا جائیگا۔