فخر زمان اور امام الحق کی جوڑی نے وہ اعزاز حاصل کرلیا جو سعید انور اور عامر سہیل بھی نہ کرپائے

سنچورین (اردو پوائنٹ تازہ ترین اخبار ۔ 8 اپریل 2021ء ) پاکستان کے اوپننگ بلے بازوں فخر زمان اور امام الحق کی جوڑی نے سب سے زیادہ سنچری سٹینڈ فراہم کرنے کا قومی ریکارڈ اپنے نام کرلیا۔ فخر زمان اور امام الحق کی جوڑی اب تک پانچ بار ٹیم کو 100 سے زائد رنز کا آغاز فراہم کرچکی ہے۔ انہوں نے جنوبی افریقہ کے خلاف تیسرے اور آخری ون ڈے میچ میں 112 رنز کی اوپننگ پارٹنر شپ کی۔

(جاری ہے)

فخر اور امام سے پہلے گرین شرٹس کی جانب سے محمد حفیظ اور ناصر جمشید ، عمران فرحت اور یاسر حمید کی اوپننگ جوڑیاں 4،4 بار قومی ٹیم کو سنچری سٹینڈ فراہم کرچکی ہیں۔ لیجنڈری اوپنر سعید انور اور ان کے پارٹنر عامر سہیل اپنے شاندار کیریئر کے باوجود صرف تین بار ہی قومی ٹیم کو سنچری سٹینڈ مہیا کرپائے تھے۔ رمیز راجہ اور سعید انور کی جوڑی نے بھی 3 مرتبہ قومی ٹیم کو 100 رنز کا آغاز فراہم کیا ۔