گلگت بلتستان نیٹ بال ٹیم کے چنا? کے سلسلہ میں دو روزہ ٹرائلز آئندہ ماہ ہونگے

گلگت (اُردو پوائنٹ اخبارتازہ ترین - این این آئی۔ 09 مئی2021ء) گلگت بلتستان نیٹ بال ایسوسی ایشن کے زیراہتمام گلگت بلتستان مرد اور خواتین نیٹ بال ٹیموں کے چنائوکے سلسلہ میں دو روزہ ٹرائلز آئندہ ماہ جون کے پہلے ہفتے منعقد ہونگے، گلگت بلتستان ایسوسی ایشن کے صدر نثار احمد کے مطابق دو روزہ ٹرائلز کی تاریخ کا اعلان ملک میں کرونا وائرس کی صورت حال کو مد نظر رکھ کر کیا جائے گا، پہلے روز مردوں کی ٹیم کے جبکہ دوسرے روزخواتین کی ٹیم کے لئے ٹرائلز ہونگے، پاکستان نیٹ بال فیڈریشن نے قومی نیٹ بال چمپئن شپ 18جون سے اسلام آباد میں منعقد کروانے کا اعلان کیا ہے، جس میں پاکستان واپڈ مرد اور خواتین کے دونوں ایونٹس میں اپنے ٹائٹل کا دفاع کریں گی، چمپئن شپ میں ملک بھر سے مرد وں اور خواتین کی سولہ ، سولہ ٹیمیں حصہ لیں گی جن میں پاکستان آرمی، پاکستان واپڈا، پاکستان پولیس، پاکستان ایئرفورس، پاکستان نیوی، پاکستان ریلوے، پاک بورڈز، ہائرایجوکیشن کمیشن، پنجاب، بلوچستان، سندھ، خیبرپختونخوا، گلگت بلتستان، فاٹا، آزادجموں و کشمیر اور اسلام آباد کی ٹیمیں شامل ہیں۔

(جاری ہے)

واضح رہے کہ یہ چمپئن شپ 6 سی9 اپریل تک پاکستان سپورٹس کمپلیکس اسلام آباد میں کھیلی جانی تھی لیکن ملک میں کرونا وائرس کی تیسری خطرناک لہر کے باعث چمپئن شپ کو ملتوی کر دیا گیا۔