روہت شرما اور ویرات کوہلی کو بائولنگ کرنا آسان لگتا ہے: محمد عامر

لاہور (اردو پوائنٹ تازہ ترین اخبار ۔ 22 مئی 2021ء ) گزشتہ سال کے آخر میں انٹرنیشنل کرکٹ سے ریٹائرمنٹ کا اعلان کرنے والے سابق قومی فاسٹ بائولر محمد عامر نے بھارت کے اوپننگ بیٹسمین روہت شرما اور کپتان ویرات کوہلی کو گیند بازی کرنا آسان قرار دے دیا۔ ایک انٹرویو میں محمد عامر نے کہا کہ روہت شرما اور ویرات کوہلی کو بائولنگ کرانے میں کبھی مشکل نہیں ہوئی، روہت شرما کو بائولنگ کرانا آسان لگتا ہے، مجھے لگتا ہے کہ میں روہت کو آؤٹ کرسکتا ہوں۔

(جاری ہے)

محمد عامر کا کہنا تھا کہ روہت شرما کو بائیں ہاتھ کے بائولرز اور سوئنگ ہونے والی گیندوں کے خلاف مشکلات ہوتی ہیں۔ ایک سوال کے جواب میں محمد عامر نے کہا کہ آج کے دور میں آسٹریلیا کے سابق کپتان اور نمبر ایک ٹیسٹ بلے باز سٹیو سمتھ کو بائولنگ کرانا سب سے مشکل کام ہے کیوں کہ انکی تکنیک بہت مختلف ہے۔ واضح رہے کہ 2017ء میں آئی سی سی چیمپئنز ٹرافی کے فائنل میں محمد عامر نے بھارت کے روہت شرما کو اپنے پہلے اوور میں صفر اور اس کے بعد کپتان ویرات کوہلی کو 5 رنز پر آؤٹ کیا تھا۔