پاکستان ہاکی فیڈریشن نے ’لیول 3 کوچنگ کورس‘ متعارف کرادیا

لاہور (اردو پوائنٹ تازہ ترین اخبار ۔ 11 جون 2021ء ) پاکستان ہاکی فیڈریشن (پی ایچ ایف) نے کوچز کی صلاحیت سازی پروگرام کے تحت ’’لیول 3 کوچنگ کورس‘‘ متعارف کروانے کا فیصلہ کیا ہے۔ پی ایچ ایف کے سیکریٹری آصف باجوہ کے مطابق کوچنگ کے ان کورسز کے دوران انٹرنیشنل اور ایشین ہاکی فیڈریشن بھی تعاون کریں گی۔ کورس میں تمام محکمہ جاتی ، صوبائی اور ضلعی اکائیوں کے کوچز کو شامل کیا جائے گا۔

(جاری ہے)

کامیاب کوچز لیول 3 کورس کے بعد لیول 2 اور لیول 1 کورسز میں جائیں گے۔ کورسز کے لئے پی ایچ ایف کے ذریعہ کوچنگ نصاب تیار کیا جائے گا۔ کورسز کا مقصد کوچوں کی استعداد بڑھانا اور نئے کوچز کی تیاری کرنا ہے۔ پی ایچ ایف کا منصوبہ ہے کہ ان کوچنگ کورسز کے ذریعے بین الاقوامی ہاکی اور ڈومیسٹک ہاکی کے مابین فرق کو ختم کیا جائے۔