ارشد ندیم کے اولمپک فائنل میں پہنچنے پر شوبز شخصیات کا اظہارِ مسرت

اسلام آباد (اُردو پوائنٹ اخبارتازہ ترین - این این آئی۔ 05 اگست2021ء) پاکستان کے 24 سالہ ایتھلیٹ ارشد ندیم کی جانب سے ٹوکیو اولمپکس میں جیولن تھرو کے فائنل میں پہنچنے پر شوبز شخصیات نے خوشی کا اظہار کرتے ہوئے ان کیلئے نیک تمناؤں کا اظہار کیا ہے۔ارشد ندیم نے 85.16 میٹر کے فاصلے پر جیولن پھینک کر گروپ بی میں پہلی پوزیشن حاصل کی اور فائنل راؤنڈ میں ان کا مقابلہ فن لینڈ کے لاسی ایٹالٹو سے ہوگا جو 7 اگست کو کھیلا جائے گا۔

پاکستانی ایتھلیٹ کی جانب سے شاندار کارکردگی کا مظاہرہ کیے جانے پر 4 اگست کو وہ ٹوئٹر پر ٹاپ ٹرینڈ بھی رہے اور سیاسی و سماجی افراد کی طرح شوبز شخصیات نے ان کی تعریفیں بھی کیں۔ٹی وی میزبان اور سوشل میڈیا انفلوئنسر وقار ذکا نے ارشد ندیم کی کارکردگی پر ٹوئٹ کرتے ہوئے لکھا کہ 8 گھنٹوں کے بعد یہ امید ہوئی ہے کہ اولمپک میں پاکستان کے حصے میں گولڈ میڈل آئے گا۔

(جاری ہے)

انہوں نے ارشد ندیم کو مخاطب ہوتے ہوئے لکھا کہ انہیں یقین ہے کہ ایتھلیٹ یہ کر کے دکھائیں گے۔علی ظفر نے اولمپکس کے رزلٹ کا اسکرین شاٹ شیئر کرنے سمیت ارشد ندیم کی تصویر بھی ٹوئٹ کی اور ساتھ ہی انہیں داد دیتے ہوئے تالی بجانے کی ایموجی بھی شامل کی۔یاسر حسین نے انسٹاگرام اسٹوری میں ان کی تعریف کرتے ہوئے صرف واہ واہ کا جملہ لکھا اور تالیاں بجانے کی تصویر شیئر کی۔

گلوکار عاصم اظہر نے بھی ایتھلیٹ کی کارکردگی پر انہیں داد دیتے ہوئے اٴْمید ظاہر کی کہ وہ فائنل میں بھی اسی طرح کا شاندار کھیل پیش کرکے سب کو خوش کردیں گے۔ماڈل مشک کلیم نے بھی انسٹاگرام پر ارشد ندیم کی تصویر شیئر کرتے ہوئے ان کی کارکردگی پر مسرت کا اظہار کیا اور ساتھ ہی تالیاں بجانے کی ایموجی بھی شیئر کی۔ہمایوں سعید نے ایتھلیٹ کے فائنل میں پہنچنے کو پاکستان کے لیے فخر کا مقام قرار دیا اور اپنی ٹوئٹ میں امید کا اظہار کیا کہ وہ مزید بہتر کھیل پیش کرکے لوگوں کو حیران کردیں گے۔

عدنان صدیقی نے بھی ایتھلیٹ کے فائنل میں پہنچنے کی خبر ٹوئٹ کرتے ہوئے ان کی کارکردگی پر فخر کیا۔گلوکار عمیر جسوال نے بھی ایتھلیٹ کی کارکردگی پر ان کی تعریف کرتے ہوئے فائنل میں جیت کے لیے اٴْمید بھی ظاہر کی۔