پاک بھارت میچ: محمد رضوان نے ٹی ٹونٹی میں کیچز کی سنچری مکمل کرلی

دبئی (اردو پوائنٹ تازہ ترین اخبار ۔ 24 اکتوبر 2021ء ) پاکستان کے وکٹ کیپر محمد رضوان نے ٹی ٹونٹی میں 100 کیچز مکمل کرلیے ۔ محمد رضوان نے ٹی ٹوئنٹی میچز میں 100 کیچز ورلڈ کپ میں بھارت کے خلاف میچ میں مکمل کیے۔ محمد رضوان نے پاک بھارت میچ کے دوران چھٹے اوور میں حسن علی کی گیند پر سوریا کمار یادو کا شاندار کیچ کیا۔ اس سے قبل شاہین شاہ آفریدی نے اپنی تباہ کن بولنگ سے پہلے روہت شرما اور بعد میں کے ایل راہول کو جلد چلتا کیا۔

(جاری ہے)

اوپر نیچے دو وکٹیں گرنے سے اسٹیڈیم میں بھارتی کیمپ میں سناٹا چھا گیا جب کہ پاکستانی اسٹینڈ خوشی سے جھوم اٹھا ۔ ٹاس جیتنے کے بعد بابراعظم کا کہنا تھا کہ ابتدائی وکٹیں جلد حاصل کرنے کی کوشش کریں گی اور بھارت کو دباو میں ڈالیں گے۔انہوں نے کہا کہ دوسری اننگز میں اوس بہت اہم کردار ادا کرے گی جس کا فائدہ بیٹنگ ٹیم کو ہو گا۔